Rusiye tarafından ilhaq etilgen Qırımnıñ memuriy sıñırdaki «Kalançak» kiriş-çıqış noqtasında resmiy çalışqan iç bir naqliyeci yoq, dep haber ete fevralniñ 13-nde Facebookta Ukraina prezidentiniñ Qırım MC temsilcilsiniñ muavini İzet Gdanov.
«Resmiy çalışqan naqliyeci olmağanını, er kes resmiy izin almadan çalışqanı, atta ekseriyet iç bir şekilde şirket açmadan, demek litsenziya, sigorta ve sairesi olmağanını bir fakt olaraq qayd etmek mümkün», – dep yaza Gdanov.
O, bergen malümatqa köre, qanun bozğan şahıslarğa qarşı protokol ve aktlar tizilgen.
O, «resmiy sürette yolcu naqliyesi teşkil etmek maqsadınen bu işke acele sürette devlet adına valilik, rayon memuriyetleri qarşılıq köstermeli», dep ilâve ete.
Yanvarniñ 12-nde Çonğar köyü civarlarında ilhaq etilgen yarımadağa yolcu taşıyaraq, ğayrı resmiy çalışqan taksi saipleri, «Harkov -Aqmescit» yolunı qapataraq, olarnıñ yolcu naqliyesinen alâqalı hızmet berüv falliyetini teşkerilüvine qarşı narazılıq bildirdiler.
2018 senesi yanvar ayında Ukraina prezidentiniñ Qırım MC temsilciliginiñ yolbaşçıları ilhaq etilgen Qırımğa yaqın rayonlarınen tren bağı teşkil etilüvinen alâqalı tekliflerni muzakere etmek içün «Ukrzaliznıtsya» şirketiniñ temsilcilerinen beraber toplaşuv keçirgen edi.
Qırım Rusiye tarafından ilhaq etilgen soñ, 2014 senesiniñ Ukrainanıñ qıta qısmınen yarımada arasında memuriy, amma aslında kerçek bir «sıñır» peyda oldı. Memuriy sıñırda «Kalançak», «Çaplınka» ve «Çonğar» olaraq üç kiriş-çıqış noqtası çalışıp başladı.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
