Kreml nezaretindeki Qırım Yuqarı mahkemesi fevralniñ 13-nde, 2017 senesi oktâbrniñ 14-nde bir kişilik piketke çıqqan qırımtatar, musulman 14 kişiniñ şikâyetini baqmaqnı plalaştıra.
«Qırım birdemligi» cemaat teşkilâtı haber etkenine köre, birinci basamaq mahkemesinde qırımlılarğa 10 biñ ruble (4,9 biñ grivna civarında –QA) ile 15 biñ ruble (7,3 biñ grivna civarında –QA) arasında cöremeler tayin etken qarar qabul etken edi.
«Nevbet ile şu otırışuvlar keçecek: Halilov E.,10:00, Memet L., 10:00, Zevriyev M., 10:30, Suleymanov A., 12:40, Ablayeva D., 12:50, Kulametov Z., 13:00, Ablâtipov A., 13:10, Bovbekov L., 13:15, Emuuseinov R., 13:20, Kulametov G., 13:30, Asanov D., 13:40, Naneyşvili R., 13:50, Emiusein E., 14:00, Muratov S., 14:10», – denilmekte haberde.
Oktâbrniñ 14-nde yarımadada küç idaresi hadimleriniñ qırımtatarlar, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi. Daa soñra Rusiye mahkemeleri bu piketlerniñ iştirakçilerine cöremeler tayin etti.
Piket iştirakçilerine qarşı, piket ötkerilmesiniñ tayin etilgen tertibini bozğanları içün (Rusiyeniñ Memuriy tertip bozuv aqqında kodeksi, 20.2 maddesiniñ 5-nci qısmı) memuriy protokollar tizildi.
Daa soñra Aqmescit, Canköy, Aluşta, Suvdağ şeerlerinde ve bunıñ kibi de İçki, İslâm-Terek, Qarasuvbazar ve Qurman rayonlarında mahkeme oturışuvları ötkerildi. İçki işler nazirliginiñ Qırım boyunca ekspertiza merkezi tarafından «piketler umumiy maqsat, niyet ve teşkil etilüv ile birleştirilgen» şeklinde berilgen hulâsa, qabaatlav tarafınıñ esas delili oldı.
İlhaqından soñ Qırımda rusiyeli akimiyet mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
