İmzalanğanından berli üç yıl içinde Rusiye Minsk añlaşmaları iç bir şartını yerine ketirmedi, dep haber ete Ukraina MİDiniñ matbuat kâtibi Maryana Betsa.
«2015 senesi fevralniñ 15-nde – 2014 senesi Minsk añlaşmalarınıñ uyğulanuvınen bağlı bir çareler kompleksi qabul etilgen edi. Rusiye iç bir maddesini yerine ketirmedi. Rusiyege cenk ve Ukrainanıñ turğusızlaştırluvı kerek», – dep yaza Betsa Twitterde.
Donbasstaki silâlı ziddyet 2014 senesinden yani Rusiye Qırımnı ilhaq etkeninden berli devam ete. Ukraina ve Ğarp Rusiyeni separatistlerge arbiy yardım köstergeninde qabaatlay. Kreml bu qabaatlavlarnı inkâr eterek, Donbassta yalıñız rusiyeli «göñülliler» bulunması mümkün olğanını iddia ete. BMT malümatına köre, çatışma devamında 10 300den ziyade insan elâk olğan.
Minsk-2 añlaşmaları 2015 senesi fevralniñ 12-nde imzalanğan edi. 2014 senesi sentâbr ayında, tabir caiz ise «Minsk-1» denilgen añlaşma imzalanğan edi ve vesiqa çatışma tarafdarlarını, añlaşmanıñ şartlarını yerine ketirmege mecbur etmek kerek edi. Tahminlerge köre, diger barışıq añlaşmaları 2015 senesiniñ soñuna qadar vaziyetni bütünley çezer dep tüşünilgen edi, ancaq 13 maddeniñ iç birisi yetine ketirilmedi, ateşkes ve silâlarnı telükesiz mesafege çeküv işi qısmen yapıldı, dep qayd ete çatışma tarafdarları ve mustaqil közeticiler.
