Ukraina tiş işleri nazirligi Rusiye FSB İdaresiniñ ilhaq etilgen Qırımda, casuslıqta qabaatlanıp tutulğan ukrainalınen alâqalı malümatnı teşkermekte.Bu aqta Qırım.Aqiqatqa Ukraina MİDiniñ matbuat kâtibi Maryana Betsa haber etti.
Ukraina tış siyaset muessisesi başqa bir tafsilâtlı malümat bermey.
Ukraina telikesizlik hızmeti casuslıqta qabaatlanıp Rusiye FSBsi tarafından Qırımda tutulğan ukrainalı boyunca bir izaat bermegen edi.
Daa evel Qırım.Aqiqatqa Ukraina Devlet sıñır hızmetiniñ spikeri Oleg Slobodyan, Rusiye FSBsi hadimleri tarafından Aqmescitte, casuslıqta qabaatlanıp tutulğan Ukraina vatandaşınıñ Qırım memuriy sıñırını keçken olması mümkünatınen alâqalı malümat teşkerilgeni aqqında haber etken edi.
Fevralniñ 12-nde Rusiye FSBsi ictimaiy bağlar Merkezi Aqmescitte, casusulıqta şeklengen Ukraina vatandaşını tutıp alğanı aqqında haber etken edi.
«2018 senesi fevralniñ 11-nde Rusiye Federatsiyası Federeal telükesizlik hızmeti tarafından Aqmescitte Ukraina vatandaşı Davıdenko Konstantin Aleksandroviç tutulıp alındı», – dep bildire matbuat hızmeti.
Qırım Rusiye tarafından ilhaq etilgen soñ, FSB yarımadada muntazam surette tintüvler keçire, jurnalist, faaller, cemaat erbapları sorğulay. Uquq qorçalayıcılar bunı farqlı tüşüngenlerge qarşı küreş dep tanıy.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
