Link açıqlığı

Saatnıñ esas haberi

Ukraina telikesizlik hızmeti Qırımda casuslıqta qabaatlanıp tutulğan ukrainalı boyunca bir izaat bermey. Bu aqta Qırım.Aqiqat muhbirine SBU spikeri Olena Gitlyanskaya tarif etti.

«Bu bizim salahiyetimiz tışında qala», – deyerek o, Ukraina MİD matbuat hızmetine muracaat etmege tevsiye etti.

Daa evel Qırım.Aqiqatqa Ukraina Devlet sıñır hızmetiniñ spikeri Oleg Slobodyan, Rusiye FSBsi hadimleri tarafından Aqmescitte, casuslıqta qabaatlanıp tutulğan Ukraina vatandaşınıñ Qırım memuriy sıñırını keçken olması mümkünatınen alâqalı malümat teşkerilgeni aqqında haber etken edi.

Fevralniñ 12-nde Rusiye FSBsi ictimaiy bağlar Merkezi Aqmescitte, casusulıqta şeklengen Ukraina vatandaşını tutıp alğanı aqqında haber etken edi.

«2018 senesi fevralniñ 11-nde Rusiye Federatsiyası Federeal telükesizlik hızmeti tarafından Aqmescitte Ukraina vatandaşı Davıdenko Konstantin Aleksandroviç tutulıp alındı. Mezkür şahıs Ukraina mahsus hızmetleri içün belli bir maqsatnen devletniñ tışına Rusiye Milliy gvardiyasınıñ Federal hızmeti qısım ve birlikleri, Federal telükesizlik hızmeti hadimleriniñ faaliyeti aqqında devlet sırını teşkil etken malümat bergeni, devletniñ telükesizligine zarar berebile edi», – – dep bildire matbuat hızmeti.

Qırım Rusiye tarafından ilhaq etilgen soñ, FSB yarımadada muntazam surette tintüvler keçire, jurnalist, faaller, cemaat erbapları sorğulay. Uquq qorçalayıcılar bunı farqlı tüşüngenlerge qarşı küreş dep tanıy.

Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.

XS
SM
MD
LG