Qırımdaki Rusiye FSB İdaresiniñ hadimleri Aqmescitte, casusulıqta şeklengen Ukraina vatandaşını tutıp alğan. Bu aqta fevralniñ 12-nde Rusiye FSBsi ictimaiy bağlar Merkezi haber etmekte.
«2018 senesi fevralniñ 11-nde Rusiye Federatsiyası Federeal telükesizlik hızmeti tarafından Aqmescitte Ukraina vatandaşı Davıdenko Konstantin Aleksandroviç tutulıp alındı», – dep bildire matbuat hızmeti.
«Mezkür şahıs Ukraina mahsus hızmetleri içün belli bir maqsatnen devletniñ tışına Rusiye Milliy gvardiyasınıñ Federal hızmeti qısım ve birlikleri, Federal telükesizlik hızmeti hadimleriniñ faaliyeti aqqında devlet sırını teşkil etken malümat bergeni, devletniñ telükesizligine zarar berebile edi», – denilmekte haberde.
Devlet muessisesi bildirgenine köre, cinaiy iş Rusiye Cinayet kodeksiniñ 276 maddesindeki casuslıq boyunca açılğan.
Qırım.Aqiqat meseleniñ inceliklerini bilmege areket ete. Ukrain MİDi rusiye mahsus hızmetleriniñ haberine daa iç bir izaat bermedi.
2017 senesi sentâbrniñ 29-nda Federal telükesizlik hızmeti Ukraina menfaatına casuslıq yapmaqta şeklengen eki Rusiye vatandaşını tutup alğanı aqqında haber etken edi. Bular Anna Suhonosova ve Rusiye kadrolı arbisi Dmitriy Dolgopolov ediler.
Tutup alınğan şahısnıñ ukrain ordudasınki zenaatdaşları «Rusiye FSBsiniñ versiyasını inanmağanları ve onıñ ukrain casus» olmağaınını beyan etken ediler».
2016 senesi noyabrniñ 26-nda Rusiye FSBsinin resmiy saytında, noyabrniñ 22-nde Aqyarda Qara deñiz flotı ştabınıñ sabıq zabiti, Ukraina menfaatına casuslıq yapmaqta şeklengen yedek ekinci rang kapitanı Leonid Parhomenko tutılıp alınğanı aqqında malümat peyda olğan edi.
Qırım Rusiye tarafından ilhaq etilgen soñ, FSB yarımadada muntazam surette tintüvler keçire, jurnalist, faaller, cemaat erbapları sorğulay. Uquq qorçalayıcılar bunı farqlı tüşüngenlerge qarşı küreş dep tanıy.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
