Fevralniñ 12-nde Kefe şeer mahkemesinde separatizmde qabaatlanğan qırımtatar faali Suleyman Kadırovnıñ işi boyunca mahkeme otırışuvı keçe. Bu aqta Facebookta «Qırım birdemligi» haber etmekte.
«Mahkeme materiallarnı ekspertlerge teslim etti. Olar materiallarnen tanışalar», – denilmekte haberde.
Yanvarniñ 22-nde keçken evelki mahkemede qabaatlayıcı tarafnıñ şaatı olaraq FSB Qırım idaresiniñ tehnik mutehassısı Aleksandr Vişnya sorğulanğan edi.
Ondan da ğayrı mahkemede imaye terafıñ şaatları olaraq: Kadırovqa musbet hasiyetname bergenlar arasında onen beraber Ukraina MVD organları çalışqan zenaatdaşı, şeer poliklinikasınıñ hadimi ve tanışları da sorğulandı.
Eki şaat mahkemede iştirak etip olamadı: biri - sağlığı sebebinden Kadırovnıñ aqrabası Ravi Abibulayev, digeri ise, «istiqrarsız bir regionda uzun müddetli iş seyahatı» sebebinden kelip olamağan FSB hadimi Miroşniçenko. Abibulayevniñ kösterişlerini mahkemeci oqup berdi, Miroşniçenkonıñ iş seyahatından qaytmasını beklenecek.
2016 senesi oktâbrniñ 5-nde rusiyeli küç idaresiniñ hadimleri qırımtatar faali Suleyman Kadırovnıñ evine tintüv keçirmege kelip, onıñ bilgisayar ve telefon tutıp alğan ediler. Kadırov Rusiye sıñırlarını tanımayuv ve «Asker» vatandaşlar birleşmesine qol tutuvda qabaatanğan edi.
2016 senesi kktâbrniñ 11-nde Kadırovğa qarşı separatizmde qabaatlav esasında cinaiy iş açıldı. 2017 senesi aprel ayında rusiyeli maddiy monitoring hızmeti Kadırovnı ekstremist ve terroristler cedveline kirsetti.
Kadırov cinaiy işni – onıñ cemaat faali sıfatındaki noqta-i nazarı ve uquqimaye faaliyetine qarşı mahsus hızmetler tarafından berilgen provokatsion cevap olğanını iddia ete.
