«Almaniya içün alternatif» firqası temsilcileriniñ Qırımnı ziyaret etüvi Rusiye içün bir antireklama oldı, dep saya almanyalı jurnalist Berhard Clasen. O, bu fikirni fevralniñ 7-nde Qırım.Aqiqat Radiosına bergen intervyusında beyan etti.
«Almaniya içün alternatif» firqası – pek telükeli firqa. Onıñ tış siyasette tüzgün bir strategiyası yoq, ancaq tamam bir natsist kibi, almanlar diger halqlardan yahşıdır degen qatiy bir noqtai nazarğa saipler. Onıñ temsilcileri Angela Merkel ve mültecilerge qarşı nefret tolu qonuşmalar yapalar ve bu bir tek sözlernen sıñırlanmay.Bu firqa azası olğan bir siyasetçi politsiyağa, qaçaqlarğa qarşı silâ qullanmağa tevsiye ete. Men bellesem, Rusiye bu deputatlarnı Qırımğa davet eterek, reklama yerine antireklama yapqanını añlamay», – dey alman jurnalisti.
Daa evel, fevralniñ 3-nde, «RİA Krım» informatsion agentligi yarımadanı ultrasağ «Almaniya içün alternatif» firqasınıñ temsilcileri kelecegi aqqında haber etken edi. Ziyaret programması, yerli rusiyeli yolbaşçılar ve yarımadanıñ milliy-medeniy birleşmeleriniñ reberlerinen körüşüvler keçirmek, Qırımnıñ işhaneleri ve infrastruktura obyektleri boyunca kezintilerden ibaret.
Ukrainanıñ Almaniya elçisi Andrey Melnik, çetel vatandaşlarınıñ Qırımnı ziyaret etüvi cezasız qalmaycağına söz berdi. Qırım Muhtar Cumhuriyetiniñ prokuraturası artıq yarımadağa kiriş tertibini bozğanlarğa qarşı taqiqat başlattı.
