Aqmescit SİZOsında tutulğan «Veciye Kaşka işi» figurantı, qırımtatar faali Kâzim Ametovnıñ sağlığı fanalaşa, dep haber ete Facebookta advokat Emil Kurbedinov.
«Bugün Aqmescit Taqiqat izolâtorında Ametov Kazim ağanı ziyaret ettim. O, er keske selâm etti! İzolâtordaki dayanılmaz şartlardan dolayı sağlığı fenalaşqanı aqqında ikâye etip berdi. Sanitariyazsızlıq, sıçavul, qandalay, aşalmaycaq kibi aş, sers, kislorod yetişmemezligi, 22 mahküm içün 20 yataq ve saire», – dep yaza Kurbedinov.
Onıñ yazğanına köre, faal zayıf körip başlağan, gipertoniyası bar ve yüregi ağırta eken.
Yanvarniñ 12-nde, Kreml nezaretindeki Aqmescit Kiev rayon mahkemesi «Veciye Kaşka işi» figurantlarınıñ tevqif müddetini daa eki ayğa uzatqan edi.
Noyabrniñ 23-nde kündüz Aqmescitte küç idaresiniñ hadimleri bir gruppa qırımtatarlar – Kâzim Ametov, Asan Çapuh, Ruslan Trubaç ve Bekir Degermencini tutıp aldı. Olar Türkiye vatandaşından para talap etüvde qabaatlana. Rusiye küç idaresiniñ hadimleri tarafından tutuluvlar esnasında qırımtatar milliy areketiniñ veteranı Veciye Kaşka yaramağan edi. Daa soñra qadın vefat etti.
