Ukrainanıñ Almaniya elçisi Andrey Melnik bir qaç alman siyasetçisiniñ Rusiye ilhaq etken Qırım seyahatını «mesuliyetsiz seyahat» dep ayta.
Diplomat fevralniñ 3-nde Twitterde, «Almaniya içün alternatif» firqasınıñ temsilcileri içün bu areketler «acınıqlı uquqiy neticenen» bitebilir, dep yaza.
«Yerli miqyastaki «Almaniya içün alternatif» firqasınıñ temsilcileri olğan bir qaç alman siyasetçisiniñ qanunsız işğal etilgen Ukrainağa bağlı Qırımğa seyahat etkeni, işbu deputatlar içün pek, amma pek acınıqlı uquqiy neticenen bite bile. Afsus ki, bizim tenbihlerimiz alâ daa ciddiy qabul etilmey», – dep yaza Melnik.
Bir kün evel Rusiye KHV, devletniñ yerli parlament temsilcisi olğan «Almaniya içün alternatif» firqasınıñ üç alman siyasetçisi ilhaq etilgen Qırımğa kelgeni aqqında haber etken edi.
Qırımğa çetel vatandaşlarını davet eterek, yarımadanıñ rusiyeli akimiyeti ilhaqnı qanuniyleştirmek istey.
Ukraina tış işleri nazirligi daima çetel vatandaşları ve vatandaşlığı olmağan şahıslarnı Rusiye tarafından ilhaq etilgen Qırımğa faqat Ukraina qanunları ve halqara qanunlarğa uyaraq kermege çağıra.
Ukraina MİDi daa evel, çetel siyasetçileriniñ Qırımğa kirişleri resmiy olmağanını beyan etken edi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
