Aqmescitte «ekstrimistik teşkilâtlarnıñ teşvıqatı» içün 10 künde mahküm etilgen qırımtatar faali Enver Kroş azatlıqqa çıqtı.
Qırım.Aqiqat muhbiri haber etkenine köre, fevralniñ 4-nde Aqmescit izolâtorınıñ binası ögünde Enver Kroşnı qarşılamaq içün 60-qa yaqın insan toplanğan.
«Şimdi tutulıp alınuvım ve tevqifim aqqında bir şey aytıp oturmağa istemeyim. Tek bir şey aytmağa ister edim: mahkemelerimiz adil olacağına işançımız yoq, lâkin bu çette qalmağa ve semetdeşlerimizge qol tutmamağa sebep bermey», – dedi faal azatlıqqa çıqqan soñ, qol tutqanlarğa minnetdarlıq bildirerek.
Rusiye küç idaresiniñ hadimleri yanvarniñ 25-nde saba Canköyde Enver Kroşnıñ evinde tintüv yapqan ediler. Bundan soñ onı politsiya rayon bölügine alıp kettiler. Faaliyetçiler, Kroştnıñ telefon, planşet ve noutbukı çekipalınğanını bildireler.
O, Rusiye kodeksiniñ 20.3 maddesi 1-nci qısmı (ekstrimistik teşkilâtlarnıñ atributları ya da timsallerini teşvıqatı ya da açıq olaraq numayış etüv) boyunca memuriy uquq bozuvında qabaatlanıp, 10 künge tevqif etilgen edi.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
