Fevralniñ 3-nde Herson şeer mahkemesi bir kün ögüne yaqlanğan Qırımnıñ rusiyeli sport naziriniñ sabıq muavinine nisbeten bir ay apis cezası çıqardı.Bu aqta Qırım.Aqiqatqa Qırım MC prokuraturasınıñ matbuat kâtibi Tayana Tihonçuk ikâye etip berdi.
SBU hadimleri fevralniñ 2-nde Qırım memuriy sıñırınıñ «Kalançak» kiriş-çıqış noqtasında Qırımnıñ rusiyeli sport Nazirligi reberiniñ sabıq muavinini yaqaladı. SBU spikeri Olena Gitlyanskaya sözlerine köre, yaqalanğan şahıs Ukraina qıta qısmına biometrik çetel pasportı almağa kete eken.
Qırım MC Ukraina SBUsı Baş idaresiniñ taqiqçileri Ukraina Cinaiy kodeksiniñ 111 madde 1 qısmına binaen (devlet hainligi) cinayet işi açqanlar. Şimdilik taqiqat areketleri devam ete, dep qayd ete muessise hadimleri.
Ukraina resmiy muessiseleri şimdilik yaqalanğan şahısnıñ soyadını bildirmey. Ancaq Qırım.Aqiqat tesbit etkenine köre, Qırımnıñ rusiyeli ükümetiniñsaytında 2016 senesi mayıs ayında Qırım sport naziri reberiniñ muavini vazifesinden Faruh Kamalov azat etilgen eken. Faruh Kamalovnıñ adı Rusiye «DOSAAF»ınıñ (Rusiye ordusı, aviatsiyası ve flotına göñülli yardım cemiyeti) cedveline ve ayrıca, «Qırımda Rusiye vatandaşlarınıñ vatanperverlik (arbiy vatanperverlik) terbiyesi» Devlet programmasınıñ iş gruppası terkibine kire eken.
