Link açıqlığı

Saatnıñ esas haberi

Qırımda mahkeme daa evel Novıy Mirde tutulıp alınğan Ramazanovnı apiste qaldırdı


Kreml nezaretindeki Qırım Yuqarı mahkemesinde yanvarniñ 23-nde Aqmescit rayonı Novıy Mir köyünde tintüv yapılğan soñ, tutulıp alınğan qırımtatar İsmail Ramazanovnıñ muracaatını red etti. Bu aqta fevralnıñ 2-nde Qırım.Aqiqatnıñ muhbiri haber ete.

Daa evel advokat Aleksey Ladin, yanvarniñ 23-nde Aqmescit rayonı Novıy Mir köyünde tintüv yapılğan soñ, tutulıp alınğan qırımtatar İsamail Ramazanovnıñ işi mahkemeniñ birinci basmağına qaytarılması içün muracaat etken edi.

Yanvarniñ 23-nde ilhaq etilgen Qırımnıñ Aqmescit ve İslâm-Terek rayonlarında Rusiye küç idaresi hadimleri tintüvler ötkergen edi. O künü Novıy Mirde ekstremizniñ propagandasında qabaatlanğan qırımtatar İsmail Ramazanovnıñ evinde tintüv yapılğan edi.

Daa soñra Rusiyeniñ Qırımdaki Taqiqat komitetinde, taqiqatçılar internet-radio vastasınen ekstremistik materiallarnıñ darqatılmasında qabaatlanğan Aqmescit rayonı sakinine qarşı cinaiy iş açılğanı aqqında bildirdiler.

Kreml nezaretindeki Aqmescit rayon mahkemesiniñ qadısı İrina Kirillova Ramazanovnı fevralniñ 23-ne qadar 30 künge apiske yolladı.

Qırım işğalinden soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.

XS
SM
MD
LG