Kreml nezaretindeki Qırım Yuqarı mahkemesinde advokat Aleksey Ladin, yanvarniñ 23-nde Aqmescit rayonı Novıy Mir köyünde tintüv yapılğan soñ, tutulıp alınğan qırımtatar İsmail Ramazanovnıñ işi mahkemeniñ birinci basmağına qaytarılması içün muracaat etken edi. Bu aqta fevralnıñ 2-nde Qırım.Aqiqatnıñ muhbiri haber ete.
Mahkemede belli olğanına köre, Ramazanov birinci basamaq mahkemesiniñ qararını almağan eken ve Ladinniñ sözlerine köre bu, imaye aqqı qaba şekilde bozulğan dep sayıla eken. Advokat işte bu sebepten dolayı muracaat etken eken.
Qadı Konstantin Karavayev saat 13:30ce tanışma aqqı tanığan.
Yanvarniñ 23-nde ilhaq etilgen Qırımnıñ Aqmescit ve İslâm-Terek rayonlarında Rusiye küç idaresi hadimleri tintüvler ötkergen edi. O künü Novıy Mirde ekstremizniñ propagandasında qabaatlanğan qırımtatar İsmail Ramazanovnıñ evinde tintüv yapılğan edi.
Daa soñra Rusiyeniñ Qırımdaki Taqiqat komitetinde, taqiqatçılar internet-radio vastasınen ekstremistik materiallarnıñ darqatılmasında qabaatlanğan Aqmescit rayonı sakinine qarşı cinaiy iş açılğanı aqqında bildirdiler.
Kreml nezaretindeki Aqmescit rayon mahkemesiniñ qadısı İrina Kirillova Ramazanovnı fevralniñ 23-ne qadar 30 künge apiske yolladı.
Qırım işğalinden soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
