OSCEde ABD missiyası reberiniñ muavini vazifesini eda etken Michele Siders, Rusiyege qarşı kirsetilgen Qırım sanktsiyaları ilhaq etilgen Qırımnıñ ukrain akimiyetiniñ nezareti altına qaytmağance devam etecegini beyan etti.
O, bu aqta fevralniñ 1-nde Vienada keçken OSCEniñ Daimiy keñeşi otırışuvında OSCE şimdiki reberi Angelino Alfano muracaat etip ayttı.
«Birleşken Devletler halqara miqyasta tanılğan sıñırlar dairesinde bütünley Ukrainanıñ suvereniteti, mustaqilligi ve topraq bütünligine qol tuta. Bizler til, din ya da etnik mensübiyeti qatiy nazar bütün ukrainlarniñ havfsızlığını teminleymiz. Bizler Rusiye Qırımnı ilhaq etkenini tanımay ve tanımaq nyetinde degilmiz. Rusiyege qarşı kirsetilgen Qırım sanktsiyaları ilhaq etilgen yarımadanıñ nezareti bütünley Ukrainağa qaytmağance devam etecek», – denilmekte Sidersniñ beyanatınıñ metninde.
O, Ukrainanıñ şarqındaki tecavuz içün Rusiyege qarşı kirsetilgen sanktsiyalar da, Rusiye Minsk añlaşmaları boyunca mecburiyetlerini eda etmegence devam etecegini ilâve etti.
Öz çıqışında Siders yarımadada taqip etilgen qırımtatar ve ukrain faallerinen bağlı bazı faktlarnı misal ketirip, ABD Rusiyeden bütün siyasiy mabüslerni, şu cümleden Sentsov, Kolçenko ve Yaltalı «Hizb ut-Tahrir» (Rusiye ve ilhaq etilgen Qırımda yasaqlanğan teşkilât) figurantı Emir-Usein Kukunıñ azat etmege çağırğanını qayd etti.
2014 senesi martnıñ 16-nda Qırım ve Aqyarda yarımadanıñ statusı boyunca dünyada qabul etilmegen referendum ötkerildi. Bunıñ neticesinde Rusiye Qırımnı özüne qoşqanını ilân etti. Ukraina, Avropa birligi ve ABD bunı tanımayıp, Qırım Rusiye tarafında işğal etilgenini tasdiqladılar. Martnıñ 18-nde Rusiye prezidenti Vladimir Putin Qırımnı Rusiyege «qoşulğanı» aqqında ilân etti.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
