Semaşko adına Aqmescit hastahanesinde qırımtatar faali, «Veciye Kaşka işi» figurantı Asan Çapuhnıñ tibbiy baqınuvı bitirilip, o SİZOnıñ tibbiy bölügine keçirildi, dep ikâye ete Qırım.Aqiqatqa advokat Ayder Azamatov.
«Maña haber etkenlerine köre, hulâsa (sağlıq vaziyetinen alâqalı –QA) azır eken ve onı kelecek afta berecek ekenler. Şimdilik anda neler yazılğanından haberim yoq. Özüm içün bir netice çıqaram ve, madem ki hulâsa azır, Çapuh da SİZO da ise, büyük ihtimal ekimler onı anda tutmaq mümkün dep yazğandırlar», – dep qayd etti advokat.
Azamatov, tevqif etilgen şahısnıñ alı eyileşkenini qayd etti. O, aqrabaları ketirgen ilaçlarnı qullana.
«Yani bizim muracaat ve şikâyetlerimiz tesir etti ve oña daa ziyade tibiiy diqqat ayırıla. Daa evel o, oña kimse baqğanı ve yardım etmegenine şikâyet ete edi», – dep hatırlattı advokat.
Dekabrniñ soñunda Asan Çapuh Aqmescitniñ Semaşko hastahanesinde tibbiy baqınuvdan keçkenden soñ, faal SİZOdan baqınuv devam ettirilmesi içün yollanılğan edi.
65 yaşındaki qırımtatar faali Asan Çapuh SİZOda mikroinsult keçirip, acele surette hastahanege yatqızılmasına muhtac edi. Onıñ advokatı Ayder Azamatov, imayesi altında bulunğannıñ şeer hastahanesine keçirilmesini talap etken edi.
Noyabrniñ 23-nde kündüz Aqmescitte küç idaresiniñ hadimleri bir gruppa qırımtatarlar – Kâzim Ametov, Asan Çapuh, Ruslan Trubaç ve Bekir Degermencini tutıp aldı. Olar Türkiye vatandaşından para talap etüvde qabaatlana. Rusiye küç idaresiniñ hadimleri tarafından tutuluvlar esnasında qırımtatar milliy areketiniñ veteranı Veciye Kaşka yaramağan edi. Daa soñra qadın vefat etti.
Noyabrniñ 24-nde Rusiyeniñ nezaretindeki Aqmescit Kiyev rayon mahkemesi tutulıp alınğan qırımtatar faallerini 2018 senesi yanvarniñ 15-ne qadar apiste qaldırğan edi.
