Kreml nezareti altındaki Qırım Yuqarı mahkemesi qırımtatarlarına qol tutmaq maqsadınen yapılğan bir kişilik piket iştirakçisi Usein Useinovnıñ apellâtsion şikâyetini red etti. Mahkemeniñ 10 biñ ruble (qararnen 4,9 biñ hrivna – QA) miqdarındaki cöremesi deñiştirilmey qaldı. Bu aqta fevralniñ 1-nde Facebookta «Qırım birdemligi» cemaat teşkilâtı haber ete.
Bundan evel mahkeme Dilâver Yunusovnen bağlı qararını da deñiştirmey qaldırğan edi.
Oktâbrniñ 14-nde yarımadada küç idaresi hadimleriniñ qırımtatarlar, musulmanlarğa qarşı yapqan repressiyalarına narazılıq köstermek maqsadınen bir sıra bir kişilik piketler ötkerilgen edi. Daa soñra Rusiye mahkemeleri bu piketlerniñ iştirakçilerine cöremeler tayin etti.
Piket iştirakçilerine qarşı, piket ötkerilmesiniñ tayin etilgen tertibini bozğanları içün (Rusiyeniñ Memuriy tertip bozuv aqqında kodeksi, 20.2 maddesiniñ 5-nci qısmı) memuriy protokollar tizildi.
Daa soñra Aqmescit, Canköy, Aluşta, Sudaq şeerlerinde ve bunıñ kibi de İçki, İslâm-Terek, Qarasuvbazar ve Qurman rayonlarında mahkeme oturışuvları ötkerildi. İçki işler nazirliginiñ Qırım boyunca ekspertiza merkezi tarafından «piketler umumiy maqsat, niyet ve teşkil etilüv ile birleştirilgen» şeklinde berilgen hulâsa, qabaatlav tarafınıñ esas delili oldı.
Qırım işğalinden soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
