Herson vilâyeti Geniçesk rayonında XX yüzyıl başında qırımtatarlarnıñ milliy ve maneviy lideri olğan Noman Çelebicihannıñ hatırasına bağışlanğan tedbir keçirmege azırlanalar. Bu aqta Qırım.Aqiqatqa Geniçesk rayon devlet memuriyeti reisiniñ muavini Gulnara Bekirova ikâye etip berdi.
Qırımtatar erbabınıñ facialı ölümine 100 yıl toluvı munasebetinen mektep talebeleri, yerli idare temsilcileri, cemaat teşkilâtlarını celp eterek, fevralniñ 22-nde Arabat belinde yerleşken Sçastlivtesevo köyünde, fevralniñ 23-nde Novoalekseyevkada hatıra aqşamları, fevralniñ 20-23 arasında rayonnıñ umumtasil ve medeniy muessiselerinde edebiy oquvlar, «tögerek masalarnıñ» bu mevzupa bağışlanğan toplaşuvları, vatanperverlik dersleri, fevral ayı zarfında ise, ayrıca sergi ve ekspozitsiyalar ötkerilecek.
Onıñ sözlerine köre bundan da ğayrı, «Öz halqınıñ meşur evlâdı» leyhası tanıtıluvınıñ ötkerilmesi ve tedbirlerniñ resmiy web-saifesi teşkil etilmesi planlaştırıla.
Tedbir yerli memuriyet tarafından keçirilmesi planlaştırılaraq, qırımtatar meclislerinen uyğunlaştırılğandır.
Geniçesk rayonı Ukrainanıñ qıta qısmında toplu olaraq qırımtatarlarınıñ eñ çoq yaşağan yekâne region sayıla. Region Rusiye ilhaq etken Qırımnen sıñırdaş.
Noman Çelebicihan (1885-1918) – qırımtatar yazıcısı, qırımtatarlarnıñ milliy gimniniñ muellifi, 1917-1918 seneleri qurulğan qırımtatar halqı birinci Qurultaynıñ esasçısı olğan diniy, cemaat ve siyasiy erbabıdır.
1918 senesi fevralniñ 23-nde Noman Çelebicihan Qırımda rusiyeli bolşevikleri tarafından öldürilip, cesedi deñizge atılğan edi.
