Ukraina prezidentiniñ Qırım MC temsilciliginiñ yolbaşçıları ilhaq etilgen Qırımğa yaqın rayonlarınen tren bağı teşkil etilüvinen alâqalı tekliflerni muzakere etmek içün «Ukrzaliznıtsâ» şirketiniñ temsilcilerinen beraber toplaşuv keçirdi.
Ukraina prezidentiniñ Qırım MC temsilciligi Facebookta haber etkenine köre, söz «Kalançak» kiriş-çıqış noqtasına ve yarımadağa eñ yaqın yerleşken «Vadim» demiryol stantsiyasınıñ qullanıluvı» aqqında ketken.
«Yolcular içün qolaylıq yaratmaq maqsadınen Hersonnen «Vadim» stantsiyası arasında şeerlerara bağnı faalleştirmek ve doğruda-doğru demiryol vagonları ya da yolcu trenlerini qullanuv yolunen işbu stantsiyağa vastasız taşımaq hızmetini teşkil etüv yolları muzakere », – denilmekte haberde.
Haberge köre, toplaşuv zarfında «kerekli işler içün qısqa ve uzun müddetli añlaşmalarğa erişilip, bu leyha içün ileride başqa toplaşuvlar keçirilmesi planlaştırılğandır».
2014 senesi dekabrniñ 27-nde Rusiye Qırımnı ilhaq etkeni sebebinden «Ukrzaliznıtsâ» havfsızlıq maqsadınen Qırım ile Ukraina arasında ve yarımadağa qatnağan halqara tren ve demiryol alâqası kesken edi. Qırım yönelişinde qatnağan trenler artıq Novoalekseyevka ve Hersonğace bara.
Qırım 2014 senesiniñ başında Rusiye tarafından işğal etilgeninden soñ Ukrainanıñ qıta qısmınen yarımada arasında memuriy, aslında - tam bir «sıñır» peyda oldı. Memuriy sıñırda «Kalançak», «Çongar» ve «Çaplınka» olmaq üzre üç kiriş-çıqış kontrol noqtası çalışmaqta.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
