ABD maliye nazirligi, olarğa nisbeten sanktsiyalar kirsetilmesi mümkün olacaq sımalar kirgen «Kreml esabatı» derc etüvi, qırımtatarlarnıñ Rusiye tarafından ilhaq etilgen Qırımda insan aqlarını bozğanı aqqında dünya cemaatçılığına ikâye etip berüv ıntıluvlarını amelge keçirecek.
Bu aqta yanvarniñ 31-nde Qırımtatar Millliy Meclisiniñ reisi Refat Çubarov, Ukrain buhran media merkezinde Qırımtatar resurs merkeziniñ maruzasını tanıtğanda beyan etti.
«Qırımtatar Milliy Meclisiniñ qatiyen açıq pozitsiyasını bildirile ve o, Rusiye halqara teşkilâtlarnıñ rezolütsiya ve vesiqalarında belgilengen şartlarğa cevap bermegence, Putin ile diger rusiyeli siyasetçilernen iç bir türlü dialog olmaycağını tasdıqlay», – dedi Çubarov.
Onıñ sözlerine köre, Qırımtatar Milliy Meclisiniñ Rusiyege qarşı sanktiyalarnıñ quvetleştirilmesini beklemesi «bazı avropalı siyasetçilerniñ Putinni meraqlandırmaq içün, onen bir masa başına oturıp, oña uyğun kelecek uzlaşuv adımları atmaq kerek olğanını iddia etken ıntıluvlarınen bir kelmey».
«Bizim pozitsiyamız: Rusiye işğal etken ukrain topraqlarını azat etmegence, Putinnen iç bir türlü uzlaşuv olmaz, çünki bu – tecavuzcısınıñ öldürmesi, repressiya yapması ve taqip etmesini mükâfatlandıruv sayılır demekten ibaret», – dep iddia ete Çubarov.
ABD maliye nazirligi yanvarniñ 30-nda Rusiye prezidenti Vladimir Putinnen sıq munasebette olıp, olarğa nisbeten sanktsiyalar kirsetilmesi mümkün olacaq sımalar kirgen vesiqanı derc etken edi. Matbuatta bu cedvel «Kreml esabatı» adınen bellidir. Oña hususan, Rusiyeniñ 114 memurı ve 96 «oligarhı» kirdi.
Esabatqa Rusiye memuriyetiniñ idaresi, hususan, memuriyet reberi Anton Vayno, onıñ muavini Aleksey Gromov, Vladimir Putinniñ matbuat kâtibi Dmitriy Peskov, prezident mesleatçısı Vladislav Surkov kirdiler. Aynı zamanda cedvelge Federatsiya Şurasınıñ spikeri Valentina Matviyenko, Devlet dumasınıñ spikeri Vyaçeslav Volodin, «Rosneftniñ» reisi İgor Seçin, «Gazprom» reberi Aleksey Miller, tış istihbarat hızmetiniñ müdiri Sergey Narışkin ve FSB müdiri Aleksandr Bortnikov kirdi.
Yanvarniñ 29-nda Vladimir Putinniñ matbuat kâtibi Dmitriy Peskov, Moskva azırlanması beklenilgen «Kreml esabatı»nı ABDniñ, martnıñ 18-nde keçirilmesi planlaştırılğan Rusiye prezidenti saylâvlarına tesir etmekniñ bir teşebbüsi dep tanığan edi.
Aqyarnıñ rusiyeli sabıq gubernatorı Sergey Menyaylo ve Rusiye perzidentiniñ Qırımdaki temsilcisi Oleg Belovantsev da «Kreml esabatı» kirsetildi.
Rusiye prezidenti Vladimir Putin, ABD maliye nazirligi derc etken «Kreml esabatı» «qıyın alda bulunğan» Rusiye-Amerika munasebetlerini mürekkepleştire, dep saya.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
