Rusiye baş naziri Dmitriy Medvedev özüniñ belçikalı zenaatdaşı Charles Michelnen yapqan körüşüvi neticesinde «Kreml esabatınıñ» Rusiye içün «boş» bir şey olğanını beyan etti.
«Bu cedvelniñ manası ne? Men bu cedvelniñ manası «sıfır», der edim. Onıñ iç bir manası yoq, çünki bizler bunıñ ters tarafını tasavur etip baqsaq ve eger de, prezident Trumpnıñ bütün memuriyeti, Temsilciler palatası, Senat, Yuqarı mahkeme, baş prokuror ofisini qoşıp, bir cedvel azırlağan olsaq edi, Amerikada neler olur edi? İç bir şey olma edi. İşte, bizim devlettede aynı şekilde, iç bir şey olmaz», – dep bildire TASS Medvedevniñ sözlerini.
Ancaq onıñ sözlerine köre, eger Washington Moskvağa qarşı yañı sanktsiyalar kirsetecek olsa, Rusiye tarafından da «yeterli cevap» berilir.
Medvedev «Kreml esabatınıñ» derc olınuvına ABD ve Rusiye arasındaki munasebetlerniñ «zeerlenüvi» dep ilâve etti.
ABD maliye nazirligi yanvarniñ 30-nda Rusiye prezidenti Vladimir Putinnen sıq munasebette olıp, olarğa nisbeten sanktsiyalar kirsetilmesi mümkün olacaq sımalar kirgen vesiqanu derc etken edi. Matbuatta bu cedvel «Kreml esabatı» adınen bellidir. Oña hususan, Rusiyeniñ 114 memurı ve 96 «oligarhı» kirdi.
Esabatqa Rusiye memuriyetiniñ idaresi, hususan, memuriyet reberi Anton Vayno, onıñ muavini Aleksey Gromov, Vladimir Putinniñ matbuat kâtibi Dmitriy Peskov, prezident mesleatçısı Vladislav Surkov kirdiler. Aynı zamanda cedvelge Federatsiya Şurasınıñ spikeri Valentina Matviyenko, Devlet dumasınıñ spikeri Vyaçeslav Volodin, «Rosneftniñ» reisi İgor Seçin,«Gazprom» reberi Aleksey Miller, tış istihbarat hızmetiniñ müdiri Sergey Narışkin ve FSB müdiri Aleksandr Bortnikov kirdi.
Yanvarniñ 29-nda Vladimir Putinniñ matbuat kâtibi Dmitriy Peskov, Moskva azırlanması beklenilgen «Kreml esabatı»nı ABDniñ, martnıñ 18-nde keçirilmesi planlaştırılğan Rusiye prezidenti saylâvlarına tesir etmekniñ bir teşebbüsi dep tanığan edi.
Aqyarnıñ rusiyeli sabıq gubernatorı Sergey Menyaylo ve Rusiye perzidentiniñ Qırımdaki temsilcisi Oleg Belovantsev da «Kreml esabatı» kirsetildi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
