Kreml nezaretindeki Qırım Yuqarı mahkemesi «26 fevral işi» figurantlarınıñ şikayetini red eterek, Ali Asanov ve Mustafa Degermenciniñ ev apsini devam ettirdi.
Qırım.Aqiqat muhbiri haber etkenine köre, faallerniñ imayecileri işniñ vaziyeti, tibbiy nezaretten keçirilüv zarureti ve işnen teminlemek kerek olğanınen bağlı delillerini mahkeme esapqa almağan.
Qabaatlayıcı taraf al-azırda sıñırlav çareleriniñ deñiştirilmesine bir esas olmağanında israr etti. Bu esasta mahkeme şikâyetniñ qanaatlendirilmesini red etti.
Yanvarniñ 22-nde Kreml nezaretindeki Aqmescit Merkeziy rayon mahkemesi «26 fevral işi» figurantları olğan Mustafa Degermencinen Ali Asanovnıñ ev apsini eki ayğa, yani aprelniñ 7-ne qadar uzatqan edi.
2015 senesinde bir gruppa qırımtatar faallerine qarşı, 2014 senesi fevralniñ 26-sında Qırım Yuqarı Radasınıñ binası ögünde Ukrainanıñ topraq bütünligine qol tutmaq maqsadınen yapılğan mitingde iştirak etkenleri içün mahkeme başlatıldı. Olar kütleviy nizamsızlıqlarda iştirak etkenlerinde qabaatlandı.
Daa soñra mahkeme «Fevral 26 işi»ni ekige ayırdı: qırımtatar milliy areketiniñ liderlerinden biri Ahtem Çiygoznıñ işi, davanıñ diger figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nabiyevniñ işinden ayırıldı.
Rusiye akimiyeti oktâbrniñ 25-nde Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umerov ve Çiygoz Kyivge keldiler.
