Ukraina prezidenti Petro Poroşenko «Kreml esabatı» Rusiye tecavuzına qarşı yapılğan küreşte yetekçilikniñ daa bir numayışı olğanını beyan etti. Bu aqta o özüniñ Facebook saifesinde yaza.
«Rusiye tecavuzına qarşı yapılğan küreşte bir daa yetekçilikni numayış etken Washingtonğa samimiy teşekkürlerimni bildirem. Umumiy transatlantik cebeniñ qaviyleştirülüvi içün bizim Avropalı işdeşlerimiz tarafından kerekli qararlar qabul etilecegine inanamız», – dep yaza o.
Poroşenkonıñ sözlerine köre, sanktsiyalarnıñ küçü ve tesiri daa ziyade arta.
«Sıñırlav çareleriniñ toplağıç effekti tecavuzcınıñ maddesini qaçınılmaz bir tarzda ve eminliknen sıñırlay. Ukrainanıñ suvereniteti ve topraq bütünligi bütünley tiklenmegence bu böyle devam etecek», – dep ilâve ete Ukraina prezidenti.
ABD maliye nazirligi yanvarniñ 30-nda Rusiye prezidenti Vladimir Putinnen sıq munasebette olıp, olarğa nisbeten sanktsiyalar kirsetilmesi mümkün olacaq sımalar kirgen vesiqanu derc etken edi. Matbuatta bu cedvel «Kreml esabatı» adınen bellidir. Oña hususan, Rusiyeniñ 114 memurı ve 96 «oligarhı» kirdi.
Esabatqa Rusiye memuriyetiniñ idaresi, hususan, memuriyet reberi Anton Vayno, onıñ muavini Aleksey Gromov, Vladimir Putinniñ matbuat kâtibi Dmitriy Peskov, prezident mesleatçısı Vladislav Surkov kirdiler. Aynı zamanda cedvelge Federatsiya Şurasınıñ spikeri Valentina Matviyenko, Devlet dumasınıñ spikeri Vyaçeslav Volodin, «Rosneftniñ» reisi İgor Seçin,«Gazprom» reberi Aleksey Miller, tış istihbarat hızmetiniñ müdiri Sergey Narışkin ve FSB müdiri Aleksandr Bortnikov kirdi.
Yanvarniñ 29-nda Vladimir Putinniñ matbuat kâtibi Dmitriy Peskov, Moskva azırlanması beklenilgen «Kreml esabatı»nı ABDniñ, martnıñ 18-nde keçirilmesi planlaştırılğan Rusiye prezidenti saylâvlarına tesir etmekniñ bir teşebbüsi dep tanığan edi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
