Keriçteki Yeñi Qale merkeziy araba qapısı kemeriniñ tolalar avdarılğanı sebebinden ziyaret etilüvi yasaqlandı. Şarqiy Qırım tarühiy-medeniy qoruq matbuat merkezi haber etkenine köre, yasaq «bir kişilik ya da gruppa şeklindeki ziyaretler esnasında bahtsız adiselerge fırsat bermemek» maqsadınen yapılğan.
«Osmanlı mimarlığına ait abideniñ ziyaret etilüvi 2018 senesi yanvarniñ 22-nde yüz bergen fevqulâde vaziyet sebebinden yapılmaqta: (Yeñi Qaleniñ) cenübiy araba qapısı kemerinde çatlaqlar peyda olğanı körüne ve bir qaç saattan soñ – tış qısmındaki tolalarnıñ bir qısmı avdarıla», – denilmekte haberde.
Qoruq hadimleri, şimdi «qanunda bildirilgen tertipke uyğun olaraq qaleni tedqiq etüv ve avdarıluv sebeplerini aydınlatuvnen bağlı işler devam etmekte» dep qayd ete.
Yanvarniñ 24-nde Keriçte Yeñi Qaleniñ cenübiy araba qapısı kemerindeki tış tarafındaki tolalarnıñ bir qısmı avdarılğanı aqqında belli olğan edi.
Yeñi Qale Keriç boğazınıñ kenarında yerleşmekte. O, XVIII asırda osmanlılar tarafından qurulğan. Qale Azav deñizi ile Qara deñiz arasında gemilerniñ keçisini kontrol ete edi.
