Ukraina devriye politsiyasınıñ hususiy alt bölügi Qırın memuriy sıñırda, hususan «Kalançak», «Çonğar» ve «Çaplınka» olaraq üç kiriş-çıqış noqtasında çalışıp, Strelkovoye-Geniçesk-Herson yolunı nezaret etecek.
Bu aqta Qırım.Aqiqat Radiosı efirinde Qırım MC ve Aqyardaki Milliy politsiyası baş idaresiniñ spikeri Volodımır Şabliyenko ikâye etip berdi.
«Qırım sakinleri öz problemlerinen ukrain politsiyasına muracaat ete ediler. Onıñ içün Milliy politsiyası reberi hususan Ukrainanıñ qıta qısmınen ilhaq etilgen Qırım (Qırım memuriy sıñırında -QA) çalışması içün, Hersonda hususiy alt bölük teşkil etmege qarar berdi. Politsiyası hadimleri «Kalançak», «Çonğar» ve «Çaplınka» olaraq üç kiriş-çıqış noqtasında çalışıp, Strelkovoye-Geniçesk-Herson yolunı nezaret etecek. Şimdi teşkiliy azırlıqlar yapıp, hadimlerniñ yerleştirilüvinen oğraşamız», – dey Şabliyenko.
Milliy politsiyası temsilcisiniñ sözlerine köre, yaqın vaqıtta Qırım devriye politsiyasında çalışacaqlar alınıp başlanacaq. Bu arada alt bölükler yerleşecek haneler de tapıldı.
Keçenlerde Ukraina MVDsinde 2018 senesiniñ soñuna qadar, Qırım ve Aqyar devriye politsiyasınıñ hususiy alt bölügini meydanğa ketirilmesi planlaştırılğanı aqqında aytqan edi.
Ukraina iç işleri naziri Arsen Avakov Milliy politsiya ve Milliy gvardiya Qırım ve Donbass azat etilgen soñ, azat etilgen territoriyalarda birlikte çalışacağı içün, şimdiden başlap azırlanmaq kerek olğanlarını beyan etti.
