Dört Qırım sakinini qanunsız olaraq qumar oyunlarını teşkil etüv ve keçirüvde qabaatlaylar. Bunı Rusiye Tahqiqat komiteti Qırım boyunca idaresiniñ matbuat hizmeti bildire.
Matbuat hizmetinde: «Tahqiqatnıñ malümatına köre, 2017 senesinden başlap, Kefe sakini olğan bir qadın bir cinaiy grup meydanğa ketirdi. Oña qadınnıñ üç tanışı kirdi. O, eki odada oyun avtomatlarınıñ işini teşkil etti ve ondan ğayrı yutuqnıñ berilmesi ile qazanılğan paralarnıñ paylaştırılması, çinaiy grupnıñ azalarına paranıñ tölenmesi kibi qumar oyunlarınıñ ötkerilmesi tertibini işlep çıqtı», – dep ikâye ettiler.
Muessisede, oyun avtomatları klubu saibesiniñ planı boyunca oyuncılar, oyun avtomatları zalınıñ idarecisi ile riskke esaslanğan ağzaviy añlaşma yapıp, oña para bere ve ondan soñ oynamaq içün oyun avtomatlarından birini saylap ala ediler.
Bildirilgenine köre, şübhe altında bulunğan şahıslar yaqalandı. Olarğa qarşı sıñırlav tedbiriniñ saylanması aqqında mesele al etile.
Qabaatlanğanlar tarafından şimdilik açıq menbalarda izaatlar yoq.
