Link açıqlığı

Saatnıñ esas haberi

«Qarşılıq kösterilmedi»: ne içün Kyiv Qırımda arbiy operatsiya başlatmadı?


Aqmescitnıñ ava limanında Rusiyeniñ arbiy hadimleri, 2014 senesi fevral 28 künü

Rusiye Qırımnı işğal etkende Kyiv askerlerni kirsetmek ya da yarımadada terrorizmge qarşı operatsiyanı başlatmaq kerek edi, – bu fikirni Viktor Yanukoviçniñ işi boyunca mahkemede Qırımnıñ sabıq baş naziri Anatoliy Mogilöv söyledi. Lâkin aynı mahkemede Qırımtatar Milliy Meclisiniñ reisi Refat Çubarov, fikrince, Qırımnı «halqara sistema, BMTden başlap, Ukrainağa barğance bu işnen oğraşmağa kerek olğan episi teslim etti», dep qayd etti.

Viktor Yanukoviç devletke hainlik, cenkniñ alıp barılmasına yardım ve insanlarnıñ ölümi içün sebep olğan Ukrainanıñ topraq bütünligi ve toqunılmazlığına qarşı areket etkeninde qabaatlandı. Bu maddeler boyunca Yanukoviçke 15 yılğace apis cezası berile bile. Yanukoviç bu qabaatlavlarnı inkâr ete.

Qırımnıñ sabıq baş naziri Anatoliy Mogilöv, 2014 senesi fevralinde yarımadadaki vaziyetni yımşatmaq imkânınıñ Kyiv tarafından qaçırılğanından emin.

Kyivden asıl da iç bir qarşılıq kösterilmedi
Anatoliy Mogilöv

«Qırımda Kyiv tarafından bir de bir munasip qarşılıq öyle de alınmadı. İç kimseden. Men 2010-2011 seneleri arasında özüm Milliy telükesizlik ve müdafaa keñeşiniñ (SNBO) azası edim. Anda qararlarnıñ nasıl çıqarılğanını tasavvur etem. Bu sebepten bu adiselerniñ neticelerini yoq etmek içün ya Terrorizmge qarşı operatsiya (ATO), ya da cenk vaziyetiniñ ilân etilmesi kibi bir de bir tedbirniñ alınması boyunca munasip qararlar çıqarılmaq kerek edi. Qırımğa Nalivayçenko ile Avakov kelgende, mennen kimse bağlanmadı, Qırım akimiyetiniñ bir de bir vekili ile asıl da laf etmediler. Ondan da ğayrı, men soñundan SNBO protokolını oquğanda, maña köre, mantıq boyunca, Qırım vekillerinden birini çağırmaq kerek ediler. Misal içün, meni. Lâkin bu yapılmadı. Kyivden asıl da iç bir qarşılıq kösterilmedi».

Anatoliy Mogilöv
Anatoliy Mogilöv

Qırım aq-uquq qorçalayıcısı, «QırımSOS» cemiyet teşebbüsiniñ teşkilâtçılarından biri, Aleksandra Dvoretskaya, Anatoliy Mogilöv özüni Ukrainanıñ topraq bütünligini qorçalağan adam olaraq köstergende aynecilik yapa, dep tüşüne.

Anatoliy Mogilöv da azası olğan Bölgeler Fırqası (Partiya Regionov) Avromeydan vaqtında qolundan kelgeni qadar Qırımda Kyivdeki vaqialarğa qarşı memnüniyetsizlikni qozğata edi
Aleksandra Dvoretskaya

– Anatoliy Mogilöv da azası olğan Bölgeler Fırqası (Partiya Regionov) Avromeydan vaqtında qolundan kelgeni qadar Qırımda Kyivdeki vaqialarğa qarşı memnüniyetsizlikni qozğata edi. Uquqqoruyıcı organlar Avropa tarafını tutqan faaliyetçilerge qarşı areket etken şahıslarnı cezasız qaldıra ediler. Viktor Yanukoviçniñ tarafdarları Meydanğa qarşı gençlerni ve sportçularnı qullandı, futbol ultrasları ise olarqa qarşılıq köstere ediler. Lâkin sözde Qırımdaki özüni mudafaa etüv birliklerinde menim içün tanış olmağan simalarnıñ çoq olğanını hatırlayım. Mence, büyük ihtimal ile, onda eñ başından Rusiyeden kelgenler buluna edi. Asılında Anatoliy Mogilövdan, sanki yalıñız Kyiv, askerlerge emir bermegeni içün, Qırımnı teslim etti, degenini eşitmek, biraz hucur kele. Vaziyet bundan bayağı murekkep edi.

Aleksandra Dvoretskaya
Aleksandra Dvoretskaya

Qırımnıñ sabıq baş naziri «Sila prava» («Uquq küçü») cemiyet teşkilâtınıñ reisi Andrey Sençenko Viktor Yanukoviçke qarşı mahkeme davasına Kremlniñ propaganda kampaniyası dey.

Qırımnıñ baş naziri ve sabıq Ukraina içki işler nazirine vaziyet aqqında haber berilmegenine inanmayım
Andrey Sençenko

(2014 senesi – QA) fevralniñ 26-sında, şu Aqmescitteki Ukrainanıñ bütünligi oğrunda mitingi kününde, memuriy binalarnıñ zapt etilmesiniñ arfesinde Qırımda buluna edim. Uçaqnen keler kelmez Anatoliy Mogilövnen körüşe bildim. Ve o vaqıt o, maña, Aqmescitte Rusiye arbiy ştablarınıñ meydanğa ketirilgenini ve olarğa pek acele qarşılıq köstermek kerek olğanını degen edi. Qırımnıñ baş naziri ve sabıq Ukraina içki işler nazirine vaziyet aqqında haber berilmegenine inanmayım. Şimdi ise o, o vaqıt aytqanlarına zıt kelgen ifadeler bere. Mence, şimdiki Viktor Yanukoviçke qarşı mahkeme davası, Kremlniñ propaganda kampaniyasına çevirildi. Oturışuvlarını milliy televideniyede köstereler, ve Moskva, advokatlar ile şaatlarnıñ ğayreti vastasınen, Ukraina cemiyeti içinde uydurma malümatlarnı darqata. Sabıq prezidentniñ qorçalayıcıları, vastasız vazifeleriniñ sıñırlarını bayağı keçip, toqtamayıp uydurma qozğatıcı iddialar ifade eteler.

Andrey Sençenko
Andrey Sençenko

(Materialnıñ metin versiyasınıı Vladislav Lentsev azırladı)

XS
SM
MD
LG