Kreml sabıq prezident Viktor Yanukoviçniñ mahkemesini, 2014 senesi fevral ayındaki vaqialarnı, şu cumleden Qırımnen bağlı olğan qısmını da ğayrıdan yazıp öz propagandasını qabul ettirmek içün qullana, dep beyan etti Qırım.Aqiqat Radiosına Qırımnıñ sabıq baş naziriniñ muavini, «Sila prava» cemaat teşkilâtınıñ reisi Andrey Sençenko, yarımada ükümetiniñ yolbaşçısı Anatoliy Mogilövnıñ mahkemede şaatlıq yapqanda aytqanlarına izaat bererek.
«Viktor Yanukoviçniñ şimdiki mahkemesi Kremlniñ propaganda kampaniyasına çevirildi. Otırışuvlar milliy telekanallarda numayış etile, Moskva ise, advokat ve şaatlar vastasınen ukrain cemiyetine, şu cumleden Qırımnıñ Rusiye tarafından ilhaq etilgeninen alâqalı yalan haberler bere. Sabıq prezidentniñ imayecileri öz vazifeleriniñ bayağı tışına çıqıp, daima yalanlar uyduralar. Meselâ, «silâlı meydancılar» «Berkutnı» qurşunğa tizgeni aqqındaki yalan misali. Bu – bilerek aytılğan yalanlar», – dep qayd ete siayasetçi.
Mogilöv mahkemede, Ukraina milliy telükesizlik ve mudafaa Şurası Rusiye yarımadanı ilhaq etken vaqıtta Qırımda terroristlerge qarşı operatsiya başlatmaq ya da cenk vaziyeti ilân etmek kerek edi, dep ayttı.
2017 senesi iyün ayınıñ soñunda mahkeme sabıq prezident Viktor Yanukoviçniñ devlet hainliginen bağlı işni ğıyaben baqmağa başlay. Bundan soñ Yanukoviçniñ advokatları bu mahkemede iştirak etmekni red eteler ve oña bir qaç sefer yañı devlet imayecisi tayin etile.
Yanukoviç Ukrainadaki, hususan 2013 senesi noyabr ayından başlap, 2014 senesi fevral ayına qadar salahiyetini aşuv, Maydandaki faallerniñ kütleviy öldirilüvi ve 2010 senesi devlet iqtidarını qolğa keçirgeninen bağlı bir sıra cinaiy işlerniñ figurantıdır.
Maydanda narazılıq bildirgenlerni atıp öldürgen soñ, Ukrainanıñ sabıq prezidenti Rusiyege qaçıp keterek, qabaatlavlarnı red ete.
