Link açıqlığı

Saatnıñ esas haberi

PASE Rusiyeden Qırım ve Donbassnen alâqalı rezolütsiyalarnı eda etmesini talap etti – Aryev


Volodımır Aryev
Volodımır Aryev

Avropa Şurasınıñ Parlament assambleyası Rusiyeden, ilhaq etilgen Qırım ve işğal altındaki Dondassnen bağlı meseleler boyunca PASE rezolütsiyasını eda etmesini talap etti. Bu aqta yanvarniñ 26-nda PASEdeki Ukraina Yuqarı Radasınıñ daimiy temsilciliginiñ reberi, assambleyanıñ vitse-prezidenti Volodımır Aryev, özüniñ Facebook saifesinde haber etmekte.

«PASE ukarain eyyetiniñ «Monitoring protsedurasınıñ inkişafı» adlı rezolütsiyasınen bağlı muim tüzetüvlerine qol tuttı. Donbasstaki tecavuz ve Qırım ilhaqı tekrar hatırlatılğanından ğayrı, assambleya Rusiyeden bir daa bu meselelernen alâqalı PASE rezolütsiyası şartlarını eda etmesini talap etti. Avropa Şurasınıñ baş kâtibi ve Rusiyeniñ qaytarılmasına qol tutqan başqa tarafdarlarnıñ areketleri çerçivesinde, bu Rusiyeniñ finansirlevini tiklev yolunda printsiplerni satmağa istegenler içün muim bir işaret olabilir», - denilmekte haberde.

Yanvarniñ 24-nde Qırımtatar Milliy Meclisi reisiniñ muavini İlmi Umerov Avropa Birligi ve Avropa Parlamentini Donbasstaki çatışuv ve Qırım işğali devam etkence, Rusiyege qarşı kirsetilgen sanktsiyalarnıñ lâğu etilmemesi ve zayıflatılmamasına çağırdı.

Yanvarniñ 23-nde Avropa Şurasınıñ Parlament assambleyası rezolütsiya qabul eterek, Rusiyeni ilhaq etilgen Qırımda insan aqlarına sayğı kösterilip, telükesizligi garantiya etmesine, qırımtatar Milliy Meclisi ve qırımtatar liderleriniñ kirişinen alâqalı yasaqlarnıı lâğu etmesine, bütün ukrain mabüslerini azat etilip, halqara teşkilâtlarnıñ Qırımğa kirmesine garantiya bermesine çağırğan edi. Ayrıca PASE Moskvadan ilhaq etilgen Qırımda «ealini köçürüv» siyaseti bitirmesini talap ete.

Ayrıca Qırımtatar Milliy Meclisi reisiniñ muavinleri Ahtem Çiygoz ve İlmi Umerov Rusiyeniñ halqara teşkilâtlarğa, şu cumleden Avropa Şurasına qaytmasına imkân berilmemesine çağırdılar.

Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.

XS
SM
MD
LG