Yanvarniñ 26-nde Kyivdeki rusiye elçihanesi ögünde faaller «Bir ses artında - bıñ ses bar, yalıñız RF akimiyeti susıp otura» şiar altında bir aktsiya keçirdi. Bu aktsiya Find and Free («Tapmaq ve azat etmek») kampaniyası çerçivesinde, Qırımda ğayıp olğan ve tutulıp alınğanlarnıñ azat etilüvine baqtırılıp ayda bir keçirilgen 19-ncı aktsiyadır. Bu aqta Qırım.Aqiqat muhbiri haber etmekte.
Aktsiya zarfında 10-ğa yaqın faal elçihane binası ogünde birer-birer sırağa tizilip, ellerinde Rusiyeden, 2014 senesinden itibaren yarımadada ğayıp olğan qırımlılarnen bağlı faktlarnı taqiq etmesine talap etken plakatlar tuta ediler.
«Bizler aktsiyalarnı er sefer farqlı şekilde ötkeremiz. Bugün bizler qırımlı faaller qullanğan bir kişilik piket şeklini saylâdıq. Bunıñ sebebi, bir kişi çıqqan taqdirde bile, olarnı yüzlerce, biñlerce insan eşite. Elbette ki, biz bunı Rusiye elçihanesi ögünde yapamız – çünki Qırımda olıp keçken bütün bozıluvlar içün bu struktura mesüliyetli», – dep ikâye ete aktsiya aqqında «KrımSOS» cemaat teşkilâtınıñ kordinatorı Tamila Taşeva.
Faaller bergen malümatqa köre, Rusiye Qırımnı ilhaq etken soñ 44 qırımlı ğayıp olğan. 17 kişi tapılğan, 16-sı – alâ daa ğayıplar sırasında, 6 kişiniñ ölüsi tapıldı, daa ekisi – apishanede tutulmaqta.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
