ABD ilhaq etilgen Qırımğa nisbeten kirsetken sanktsiyalar 33 devletten kelgen iş adamlarınıñ Qırımda çalışmasına keder etmey, dep ayta Kreml nezareti altındaki Qırımnıñ yolbaşçısı Sergey Aksönov.
«ABD eski sanktsiyalarnı uzatıp yañısı kirsetkence, Yalta halqara iqtisadiy forumı aprel ayında 50-60 devletten kelgen 500 temsilcini qabul etmege planlaştıra. Bıltırğa köre bu daa da ziyade, çünki o zaman YHİFda 46 devletten kelgen 200den ziyade musafir iştirak etken edi», – dep qayd ete Aksönov.
Onıñ sözlerine köre, Qırımda saipleri 33 devlet çetel teşkilâtı ve vatandaşı olğan üç biñge yaqın şirket qayd etilgendir.
«Olar arasında Avstriya, Büyük Britaniya, Qıbrıs, Panama, Türkiye ve digerleri bar. İtalyan iş adamalrı işbirlik yapmağa pek avesli. Ondan da ğayrı, çetel yatırımcıları yarımadada bulunğanlarını duydurmadan, bu regionda çalışma fırsatına saipler. Böyle yatırımcılar arasında avropalılar da mevcut. Belli olğan sebeplerden dolayı konkret malümat aqqında aytıp oturmam, ancaq dinamika kösterişli sayıla», – dep qayd ete Qırımnıñ yolbaşçısı.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
