Herson vilâyeti Geniçesk rayonı Novoalekseyevka qasabasında fevralniñ 1-nde memuriy hızmet berecek merkezniñ açılışınen bağlı cemaat diñlevleri ötkerilecek. Bu aqta özüniñ Facebook saifesinde Ukraina prezidentiniñ Qırım Mutar Cumhuriyetindeki temsilcisi Boris Babin yazmaqta.
«Eger cemaatçılıq maqullese, bu Qırımğa yaqın yerleşken ve kesen-kes 2018 senesi açılacaq dördünci Memuriy hızmet berüv merkezi (MHBM) olacaq», – dep qayd ete Babin.
Novoalekseyevka territorial cemiyetine esaslanğan «Novıy vizit» neşiri qayd etkenine köre, cemaat diñlevlerinde yerli akimiyet organları, Ukraina prezidentiniñ Qırım Mutar Cumhuriyetindeki temsilciligi, Herson vilâyetindeki Ukraina devlet migratsion hızmetiniñ temsilcileri, Herson vilâyetiniñ devlet memuriyeti ve Novoalekseyevka territorial cemiyetiniñ teşebbüsçi gruppası iştirak etecek.
2014 senesi Qırım Rusiye tarafından ilhaq etilgen soñ Ukraina qıta qısmınen yarımada arasında resmiy olaraq - memuriy, aslında - aqiqiy bir sıñır peyda oldı. Memuriy sıñırda «Kalançak», «Çonğar» ve «Çaplınka» olaraq üç kiriş-çıqış noqtası çalışmaqta.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
