Yanvarniñ 25-nde Bağçasaray rayonınıñ Mamaşay (Orlinoye) köyünde siyasiy mabüsler ve repressiyağa oğratılğan qırımtatar faalleri ve musulmanlarına bağışlanğan dua keçirildi. Dua «Hizb ut-Tahrir işi» boyunca ilk figurantlarnıñ tevqif etilgenine bir yıl tolğanı munasebetinen ötkerildi. Bu aqta Azatlıq Radiosınıñ rus hızmetiniñ muhbiri haber etmekte.
Ruslan Zeytullayev, Nuri Primov, Rustem Vaitov ve Ferat Sayfullayev tevqif etilgenine bir yıl toluvı munasebetinen Mamaşay köyündeki duağa Qırımnıñ Saq, Aqmescit rayonları, Bağçasaray ve diger şeerlerinden qırımtatarlar keldi.
«Bugün, adet-üzre, keçken senelerde yapılğanı kibi, bizler dua keçirdik ve Allahtan Rusiye apishanelerinde bir qaç yıldan berli çekişken balalarımıznıñ azar etilmesini tiledik. Ayrıca Yüce Allahtan olar içün sağlıq-selâmetlik ve halqımıznı repressiyalardan qorçalamasını tiledik», – dep ikâye etti «Qırım birdemligi» cemaat teşkilâtınıñ koordinatorı Dilâver Memetov.
O ayrıca, Qırım musulmanlarınıñ cemaatları ve faaller qol tutqanı sebebinden mahküm etilgenlerniñ aqrabaları yardımsız qalmağanını qayd etti.
Dua, özü qurıp bitiralmağan, lâkin qırımtatar faalleri küçünen bititrilgenZeytullayevniñ evinde keçti.
«Hizb ut-Tahrir işi» boyunca Qırımda 2014 senesinden berli 29 kişi tevqif etildi.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
