2015 senesi dekabr ayında rusiyeli küç idaresiniñ hadimleri yanvarniñ 25-ndeilhaq etilgen Qırımnıñ Canköy şeeride tutulıp alınğan qırımtatar faali Enver Kroşnı elektrik aqım berip qıynağan ediler. Bu aqta Facebookta qırımlı advokat Emil Kurbedinov haber etmekte.
«Onı yalan yolunen politsiya bölügine kirsetkenler. Anda artıq FSB hadimleri bekley eken ve onı işbirlik yapmağa zorlağanlar. Enver olarnen işbirligi yapmaycağını añlağan soñ, yerli politsiya hadimlerine onı qıynamasını emir etkenler. Olar Enverniñ başına çuval keysetip, onı bir yerlerge alıp kirerek, qıynağanlar! Uzun vaqıt ve avesliknen qıynağanlar. Enver sağ qalıp, olıp keçkenler ikâye etken, şu cumleden KHV da. O, soñki künlergece barışıqsever küreşini devam etip, Qırımnıñ siyasiy ve ictimaiy ayatında faal iştirak etmekte! O, bir kişilik piketke de çıqqan edi!» – dep ikâye etti Kurbedinov Kroşnıñ keçmişi aqqında.
İmayeci qayd etkenine köre, Kroş çekiştirüvler aqqında halq ögünde ikâye etken soñ, qabaatlılarnı cezalamaq içün «rusiyeli küç idarelerinden iç birisi parmağını bile qıbırdatmağan edi».
«Ancaq söz internetteki ictimaiy ağlarda kimsege zarar ketirmeycek bir paylâşuv aqqında ketkende, küç idaresiniñ hadimleri internet qoruyıcısı ve ulu monitorlar sıfatında aman yetişip keleler!» – dep qayd ete Kurbedinıov.
Rusiyeli küç idaresiniñ hadimleri yanvarniñ 25-nde saba ilhaq etilgen Qırımnıñ Canköy şeeri ve Seitler rayonında tintüvler ötkerdi.Ondan soñ, Canköy şeeriniñ sakini Enver Kroşnı şeer rayon politsiya bölügine, Seitler rayonı Seitler Vaqıf (Razlivı) köyünde tutulıp alınğan Ebazer İslâmovnı ise, Seitler rayonı politsiya bölügine alıp ketkenler.
Faaller haber etkenine köre, Kroşnıñ telefon, planşet ve noutbukını çekip alğanlar.
Rusiyeli küç idareleriniñ saytlarında tintüvnen alâqalı malümat yoq. Qırım.Aqiqat olıp keçkenlerniñ inceliklerini bilmege areket ete.
Qırım işğalinden soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
