Rusiyeli küç idaresiniñ hadimleri ilhaq etilgen Qırımnıñ Cankoy şeeri ve Seitler rayonında keçirgen tintüvlerden soñ tutıp alğan eki sakinini, rayon politsiya bölügine alıp ketken.
«Qırım birdemligi» cemaat teşkilâtı Facebookta haber etkenine köre, Cankoy şeeriniñ sakini Enver Kroşnı şeer rayon politsiya bölügine, Seitler rayonı Seitler Vaqıf (Razlivı) köyüniñ sakini Ebazer İslâmovnı ise, Seitler rayonı politsiya bölügine alıp ketkenler.
Cankoy şeeriniñ sakini Enver Kroşnıñ doğmış qardaşı bildirgenine köre, küç idaresi hadimleri bu areketlerni ne sebepten yapılğanından haberi yoq.
Ebazer İslâmovnıñ yaqın arqadaşları onıñ dindar bir musulman olğanı aqqında aytalar.
Rusiyeli küç idaresiniñ hadimleri yanvarniñ 25-nde ilhaq etilgen Qırımnıñ Cankoy şeeri ve Seitler rayonında tintüvler ötkerdi.
Rusiyeli küç idareleriniñ saytlarında tintüvnen alâqalı malümat yoq. Qırım.Aqiqat olıp keçkenlerniñ inceliklerini bilmege areket ete.
Qırım işğalinden soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
