Mahkeme otırışuvı esnasında evinde tintüvden soñ tutulıp alınğan Aqmescit rayonı Novıy Mir köyüniñ sakini qırımtatar İsmail Ramazanov, Qırımdaki Rusiye FSB idaresiniñ hadimleri tarafından köteklengenini beyan etti. Bu aqta yanvarniñ 24-nde Qırım.Aqiqat muhbiri haber etmekte.
«Köteklevden ğayrı iç bir hastalığım yoq. Meni FSB hadimleri kötekledi. Saba ana-babamnıñ evinde ve malüm olmağan yönelişte alıp ketken vaqıtta maşna içinde de köteklediler. Yardım istep muracaat ettim, lâkin ekimler qatiyen yardım köstermediler. Yanbaşım, eñsem ve başım ağırta. Otırışuvda iştirak etip olurımmı yoqmı, bilmeyim», – dep ikâye etti Ramazanov mahkemede.
Advokat Aleksey Ladin «acele yardım» çağırılması içün muracaat etip, ekimler onıñ mahkeme otırışuvında iştirak etip olurmı yoqmı degen manada bir hulâsa çıqarğanlarını istegen. Prokuror Ramazanovnıñ yanvarniñ 23-nde hastahanege muracaat etkende bedeninde ağır zararlanuvlar olğanı aqqında bildirgen ekspertiza hulâsasını taqdim etti. Ancaq mahkeme «acele yardım» çağırmaqnı red etken.
Aqmescit rayonınıñ Novıy Mir köyünde yaşağan qırımtatar İsmail Ramazanovnıñ evinde tintüv keçirilgen soñ, o milletlerara zıddiyet çıqaruv ve nefret doğıruvnen bağlı malümatlar tarqatuvda qabaatlanmaqta. Rusiyeli küç idaresi hadimleriniñ versiyasına köre o, malümatnı Zello internet-radiosı vastasınen tarqatğan eken.
Yanvarniñ 23-nde ilhaq etilgen Qırımnıñ Aqmescit ve İslâm-Terek rayonlarında rusiyeli küç idaresiniñ hadimleri tintüvler ötkerdi. O künü Novıy Mir köyünde yaşağan qırımtatar İsmail Ramazanovnıñ evinde tintüv keçirilerek, özü ekstremizm teşviqatında qabaatlandı.
Ondan soñ Qırım Taqiqat komiteti internet-radio vastasınen ekstremizstk materiallar tarqatuvında qabaatlanğan Aqmescit rayonınıñ sakinine nisbeten cinaiy iş açılğanı aqqında haber etken edi.
Qırım işğalinden soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
