Aqmescit rayonınıñ Novıy Mir köyünde yaşağan qırımtatar İsmail Ramazanovnıñ evinde tintüv keçirilgen soñ, o milletlerara zıddiyet çıqaruv ve nefret doğıruvnen bağlı malümatlar tarqatuvda qabaatlanmaqta. Rusiyeli küç idaresi hadimleriniñ versiyasına köre o, malümatnı Zello internet-radiosı vastasınen tarqatğan eken.
Qırım.Aqiqatqa rusiyeli Azatlıq.Radiosınıñ muhbiri haber etkenine köre, küç idaresiniñ hadimlerinde Ramazanovqa ait ve «ekstremizm alâmetleri» olğan audioqayd mevcut eken.
Bu arada Ramazanovnıñ babası, rusiyeli küç idaresiniñ hadimleri tintüv esnasında Makarov pıştavına kelişken içinde patronlar olğan paketçik ketirip taşlağanlarını iddia ete.
Tintüvden soñ Ramazanovnı tutup alaraq, şu geceniñ özünde muvaqqat izolâtorğa yollağanlar. Aqrabalarına bu aqta haber etilmegen ve olar oğlunıñ ğayıp olğanı aqqında beyan eterek, oğlunı geceniñ yarısına qadar qıdırğanlar.
Tutulıp alınğan şahısnıñ sıñırlav tedbirinen bağlı otırışuv yanvarniñ 24-nde Aqmescit rayon mahkemesinde ötkerilecek.
Yanvarniñ 23-nde ilhaq etilgen Qırımnıñ Aqmescit ve İslâm-Terek rayonlarında rusiyeli küç idaresiniñ hadimleri tintüvler ötkerdi. O künü Novıy Mir köyünde yaşağan qırımtatar İsmail Ramazanovnıñ evinde tintüv keçirilerek, özü ekstremizm teşviqatında qabaatlandı.
Ondan soñ Qırım Taqiqat komiteti internet-radio vastasınen ekstremizstk materiallar tarqatuvında qabaatlanğan Aqmescit rayonınıñ sakinine nisbeten cinaiy iş açılğanı aqqında haber etken edi.
Qırım işğalinden soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
