Link açıqlığı

Saatnıñ esas haberi

Çiygoz ve Umerov Avropa Parlamentinde Qırımdaki insan aqları aqqında ikâye etecek


İlmi Umerov ve Ahtem Çiygoz
İlmi Umerov ve Ahtem Çiygoz

Yanvarniñ 24-nde qırımtatar Milliy Meclisi reisiniñ muavinleri İlmi Umerov ve Ahtem Çiygoz, Avropa Parlamentinde Rusiye tarafından ilhaq etilgen Qırımda insan aqlarınen bağlı vaziyetke bağışlanğan diñlevlerde çıqış yapacaqlar.

Brüsselde AB qanun çıqaruv organındaki diñlevlerde, Avropa Parlamentiniñ yarımadada uquq bozıluvlarnıñ ögüni aluv ve temel aqlarnıñ imaye etilüvine yardım etüv mevzuları da muzakere etilecek.

Avropa Parlamentiniñ insan aqları alt komitetinde keçecek muzakereler esnasında, «Ukrainada insan aqlarınen bağlı vaziyet ve Avropa Parlamentiniñ mütenasip faaliyetinen beraber Avropa Birliginiñ cevabı» adı altında Avropa müessisesiniñ analitik tedqiqi taqdim etilecek.

Rusiye akimiyeti 2017 senesi oktâbrniñ 25-nde Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umerov ve Çiygoz Kyivge keldiler.

Yanvarniñ 23-nde Avropa Şurasınıñ Parlament assambleyası rezolütsiya qabul eterek, Rusiyeni ilhaq etilgen Qırımda insan aqlarına sayğı kösterilip, telükesizligi garantiya etmesine, qırımtatar Milliy Meclisi ve qırımtatar liderleriniñ kirişinen alâqalı yasaqlarnıı lâğu etmesine, bütün ukrain mabüslerini azat etilip, halqara teşkilâtlarnıñ Qırımğa kirmesine garantiya bermesine çağırğan edi. Ayrıca PASE Moskvadan ilhaq etilgen Qırımda «ealini köçürüv» siyaseti bitirmesini talap ete.

Yanvarniñ 18-nde Human Rights Watch halqara uquimaye teşkilâtı dünyadaki insan aqlarınen bağlı esabatında, Qırımdaki rusiuyeli akimiyet yarımadanıñ ilhaqına qarşı çıqqan ukrainalı tarafdarlar ve qırımtatar faallerini taqip etkeni aqqında beyan etken edi. Uquqimayecileri Rusiyeden böyle areketlerni toqtatmasını talap etken edi.

Qırım işğalinden soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.

XS
SM
MD
LG