Kreml nezaretindeki Qırım Yuqarı mahkemesi «Qırım birdemligi» faallerinden biri olğan Rustem Osmanovnıñ appelâtsiyasını red eterek, 10 biñ ruble (4,7 grivnağa yaqın – QA) miqdarındaki cöremeni deñiştirmeden qaldırdı. Bu aqta birleşmeniñ Facebook sayfesinde söz yürsetilmekte.
«Qırım birdemligi»niñ malümatına köre, imayeci taraf bir qaç ariza bermesine rağmen, olarnıñ iç birisi qanaatlendirilmegen.
2017 senesi dekabrniñ 11-nde Bağçasaray rayon mahkemesi faalni « kütleviy tedbir keçirüv tertibini bozuvı neticesinde transport ya da piyadelerge keder etkeninde» (Rusiye memuriy Kodeksi 6 maddesiniñ 20.2 qısmı) qabaatlalağan edi.
Memuriy dava materiallarında, 2017 senesi aprel ayında faal Seydamet Mustafayevniñ evinde tintüv yapılğanda, Osmanov ve diger faaller maşna ve piyadelerniñ areketine keder ekenleri aqqında söz yürsetilmekte.
Qırım işğalinden soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
