Link açıqlığı

Saatnıñ esas haberi

«Eho Moskvı»niñ baş muarriri: «Qırım Putin içün nasıl rey berecegi muim»


«Eho Moskvı» radiostantsiyasınıñ baş muarriri Aleksey Venediktov ve Rusiye prezidenti Vladimir Putin
«Eho Moskvı» radiostantsiyasınıñ baş muarriri Aleksey Venediktov ve Rusiye prezidenti Vladimir Putin

Rusiye prezidenti Vladimir Putin içün yaqında olacaq saylâvlarda Qırım nasıl rey berecegi pek muim, çünki bu oña ne derece qol tutulğanınıñ köstergiçi olacaqtır. Bunı Rusiyeli «Eho Moskvı» radiostantsiyasınıñ baş muarriri Aleksey Venediktov «Golos Ameriki»ge bergen intervyusında beyan etti.

Onıñ sözlerine köre, bundan evel keçken Rusiye prezidentiniñ saylâvları Qırımnıñ ilhaqından evel yani 2012 senesi, «Vladimir Putinniñ avdeti» şiarı altında keçken edi.

«Vladimir Vladimiroviç reyler içün küreşmey: o, oña qol tutulacağını pek yahşı bile. O, başqa bir şey içün küreşe. Başqa şeyde qanuniyleştirilmesi içün küreşe. Menim fikrime köre, «Qırım meselesi» onıñ halq sevgisi ğırdabına kömülmesine alıp keldi. Saylâvlar qaysı künge tayin etildi? Doğru – martnıñ 18-ne, Qırımnıñ qoşulğan kününe. İşte o Qırımnı qaytarır da, ondan soñ büyük bayram olur. Onıñ içün, «faizler» aqqında aytacaq olsaq, men bilgenime köre, Qırım nasıl rey berecegi pek muim. Onıñ añlayışına köre, bu ekinci bir referendum olacaq», – dep qayd etti Aleksey Venediktov.

O, Vladimir Putinniñ Rusiye prezidenti vazifesinde bulunğan nevbetteki müddeti içindeki siyaseti evelkisine köre «daa da sert ve reaktsion» olacaq dep ilâve etti. Jurnalistniñ sözlerine köre, Rusiye prezidenti 2024 senesinden soñra da devlet idaresinde qalacaq, faqat bunıñ içün Rusiye Anayasası deñiştirlmesi zarur.

Rusiye prezidenti saylâvları 2018 senesi martnıñ 18-ne yani- Qırım ilhaq etilgen künge tayin etildi. Saylâvlar kününi deñiştirgen mütenasip qanunnı Rusiye Devlet duması ve Federatsiya Şurası maqul dep körgen soñ, onı Rusiye prezidenti Vladimir Putin imzaladı.

Putinden ğayrı saylâvlarda televizyon alıp barıcısı Kseniya Sobçak, işadamları aq-uquqları boyunca vekâletli temsilci Boris Titov, LDPR lideri Vladimir Jirinovskiy, «Yabloko» esasçısı Grigoriy Yavlinskiy, işadamı Sergey Polonskiy,KPRF adından «Lenin adına sovhoz» müdiri Pavel Grudinin iştirak etmek niyetindeler.

Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.

XS
SM
MD
LG