Politsiya hadimini aqaretlegeninde qabaatlanğan faal Şevket Razzaqovnıñ işinen alâqalı Kreml nezaretindeki Bağçasaray barışıq mahkemesiniñ nevbetteki otırışuvında, olıp keçkenlerniñ operativ çeküvi baqılaması planlaştırıla. Buı aqta Qırım.Aqiqatqa Azatlıq.Radiosınıñ rusiyeli muhbiri haber etmekte.
Bu arada mahkemege maska taqıp kelgen zarar körgen şahıs, şaatlardan biri ve yerli MVD idaresi yolbaşçısınıñ ricasına binaen yanvarniñ 23-nde keçken otırışuv qapalı şekilde ötkerildi.
«İmaye etken tarafnıñ, şaatlarnıñ sorğulanuvınen alâqalı muracaatından ğayrı bütün muracaatları red etildi. Ayrıca asla yañı bir şey ilâve etmegen zarar körgen şahıs da sorğulandı ve daa evel aytqanlarını tasdıqladı. Nevbetteki otırışuvda şaatlar sorğulanıp, vaqialarnıñ 2017 senesi yapılğan operativ video çeküvleriniñ seyir etilmesi planlaştırıla», – dep ikâye etti advokat Mammet Mambetov.
Otırışıvğa kelgen qırımtatar faalleri mahkemeniñ qapalı şekilde keçkenine dair mahkeme qararına şikâyet berdiler.
Nevbetteki otırışuv yanvarniñ 30 saat 10:00da keçirilecek.
Aprelniñ 13-nde rusiyeli küç idaresiniñ hadimleri Bağçasarayda yaşağan Seydamet Mustafayevniñ evinde tintüv yapqan ediler. Politsiya hadimleriniñ areketlerini qırımtatar faalleri, şu cumleden Razzaqov da taqip eteler. Politsiya hadimleri ve OMON toplanğan insanlarğa nisbeten küç qullanıp, olarnı quvıp başlay. Neticede yedi kişi tutulıp alına ve Razzaqov politsiya hadimine «tükürerek» aqaretlegeninde qabaatlana.
Qırım işğalinden soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
