Yanvarniñ 24-nde Moskva şeer mahkemesi, Rusiyede casusluqta qabaatlanğan ukrainalı jurnalist Roman Suşenkonıñ apiste qaluv müddetiniñ uzatıluvı meselesini baqacaq.
Advokat Mark Feygin yanvarniñ 23-nde Twitterde haber etkenine köre, otırışuv saat 11:30da keçirilecegi qararlaştırıla.
Ondan da ğayrı Feygin, yanvarniñ 23-nde Lefortovo SİZOsında Suşenko omür arqadaşı ve qızınen körüşkeni aqqında bildire.
Yanvarniñ 18-nde Moskva şeer mahkemesi Suşenkonıñ apiste qaluv müddetiniñ uzatıluvınen bağlı şikâyet arizasını red etti. Apiste qaluv müddeti yanvarniñ 30-nda bite.
FSB sentâbrniñ 30-nda Moskvada ukrain jurnalisti, «Ukrinform» agentliginiñ muhbiri Roman Suşenkonı, ukrain istihbaratınıñ hadimi dep, «bir maqsatqa baqtırılğan ve devlet sırı dep sayılğan, silâlı quvetler ve Rusiye milliy gvardiyası aqqında malümat toplağanında» qabaatlayaraq, tutıp alğan edi. Jurnalistke nisbeten «casuslıq» maddesi boyunca cinaiy iş açılğan edi.
Suşenko bütün qabaatlavlarnı inkâr ete. Ukraina tarafı jurnalistke nisbeten çıqarılğan qabaatlarnı esassızdır diyerek, onıñ acele sürette azat etilmesini talap ete.
