Link açıqlığı

Saatnıñ esas haberi

Polis tevqif etilgen qırımtatar faaliyetçisi Kulametovnıñ anası yaşağan evine keldi – «Qırım birdemligi»


Yerli sakinler yaqalanğan Giray Kulametovğa qol tutmaq içün mahkeme binası yanına keldiler, 2018 senesi yanvar 18 künü
Yerli sakinler yaqalanğan Giray Kulametovğa qol tutmaq içün mahkeme binası yanına keldiler, 2018 senesi yanvar 18 künü

Qırımda Rusiye polisiniñ vekilleri yanvarniñ 22-sinde tevqif etilgen qırımtatar faaliyetçisi Kulametovnıñ anası yaşağan evine keldiler. «Qırım birdemligi» birleşmesiniñ faaliyetçisi Server Mustafayev Qırım.Aqiqatqa, ziyaret, yanvarniñ 18-nde qorantanıñ evinde ötkerilgen tintüvniñ neticeleri ile alâqalı edi, dep ikâye etti.

Faaliyetçi: «Şimdilik ne polis, ne de advokat tarafından añlaşılacaq şekilde izaatlar berilmedi. Añlaşılğanına köre, tintüv vaqtında ana tarafından eyecanlanğan alda söylengen bazı şeyler, uquqqoruyıcı organlarnıñ hadimleri tarafından qorquzuv olaraq qabul etildi. Polis vekilleri bu sebepten tafsilâtlarnı ögrenmek içün keldi emiş», – dedi.

Tevqif etilgen özü bu vaqıtqa qadar Qarasuvbazardaki muvaqqat izolâtorda buluna. Faaliyetçilerniñ bildirgenine köre, advokatlar onıñ tevqif etilgeni aqqında qararına qarşı şikâyet bermek isteyler.

Kremlniñ kontroli altında bulunğan İslâm Terek (Kirovskiy) rayon mahkemesi yanvarniñ 18-nde kvartirasında tintüv yapılğan soñ yaqalanğan qırımtatar faaliyetçisi Giray Kulametovnıñ işini baqıp çıqtı. Onı Rusiyeniñ memuriy uquq bozuvları aqqında kodeksiniñ 20.3 maddesi (1-nci qısım) boyunca qabaatlaylar. Mahkeme «2012 senesinde videorolikni derc etken içün» Kulambetovğa 10 kün apis şeklinde ceza tayin etti.

Kulametov, 2017 senesi oktâbrniñ 4-nde telükesizlik hadimleri tarafından qırımtatarlarğa, musulmanlarğa qarşı yapılğan repressiyalarğa narazılıq köstermek maqsadınen ötkerilgen bir sıra bir kişilik piketlerde iştirak etti. Daa soñra Rusiye mahkemeleri bu piketlerniñ iştirakçilerine cöremeler tayin etti.

Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqalı deye şübheli tanılğan Qırım musulmanlarınıñ evlerinde ketken sayın daa sıq surette tintüvler yapıla.

XS
SM
MD
LG