Link açıqlığı

Saatnıñ esas haberi

Bağçasaraydaki «Hizb ut-Tahrir işi» figurantlarını psihiatriya ekspertizasına yolladılar – muhbir


Bağçasaraydaki «Hizb ut-Tahrir işi» figurantları Seyran Saliyev ve Server Zekiryayevni psihiatriya ekspertizasını keçirmek içün hastahanege yerleştirdiler. Bunı yanvarniñ 21-sinde Azatlıq Radiosındaki rus hizmetiniñ muhbiri bildirdi.

Onıñ aytqanına köre, Qırım sakinlerini hastahanege bir qaç kün evel yerleştirdiler. Olar anda 28 kün bulunacaqlar.

Bildirüvde: «Añlaşıla, «Bağçasaray altılığı»nıñ diger yigitlerini de ekspertizağa ekişer ekişer yollaycaqlar», – denile.

Saliyev ve Zekiryayevniñ advokatları ya da aqrabaları tarafından olarnıñ psihiatriya ekspertizası içün hastahanege yerleştirilmeleri aqqında malümat şimdilik tasdiqlanmadı.

Kremlniñ kontroli altında bulunğan Qırım Yuqarı mahkemesi yanvarniñ 17-sinde Bağçasaraydaki «Hizb ut-Tahrir işi»niñ üç figurantı – Ernes Ametov, Marlen Asanov ve Server Zekiryayevniñ tevqif etilmesine qarşı berilgen apellâtsiyanı red etti.

Daa evel Aqmescitteki Kyiv rayonı mahkemesi daa üç «Hizb ut-Tahrir işi» figurantı – Ernes Ametov, Marlen Asanov ve Server Zekiryayevqa apis müddetini uzattı. Böylelikle olar martnıñ 9-na qadar apiste qalacaqlar.

Oktâbrniñ 11-nde Qırımda Rusiye telükesizlik hadimleri Bağçasaraynıñ altı sakini – Timur İbragimov, Marlen (Suleyman) Asanov, Memet Belâlov, Seyran Saliyev, Server Zekiryayev ve Ernes Ametovnı tevqif ettiler. FSB olarnı Rusiye ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.

«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, taqip etilüvlerniñ diniy alâmetine köre yapılğanını tüşüneler. Advokat Emil Kurbedinov, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruplarğa ait Qırım sakinleri olğanını qayd ete.

Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarınıñ qullanıluvını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni «terroristik» olaraq tanılğan 15 birleşmeniñ cedveline kirsetip, yasaq etti.

XS
SM
MD
LG