«Qırım birdemligi» birleşmesi Facebooktaki saifesinde «Yaltadaki Hizb ut-Tahrir işi»niñ figurantı Vadim Siruknıñ adından muracaatını derc etti. Mektübinde o, qol tutqan ve mabüsler içün dualar oquğanlarğa teşekkürlerini bildirip, «biz, üstümizge bastırılğan «terroristler» tamğasını iç bir vaqıt qabul etmemiz», dep israr ete
Siruk: «Epimiz erte-keç ölecekmiz, ve muimi olğan – kelecek nesillerge bizden neler miras qalacaq, bizler içün dualarmı yoqsa asırlar devamında lânetlermi oqulacaq, çünki areketsizlik de ameldir ve biz onıñ içün cevap berecekmiz!!! Biliñiz ki, er bir insan – şahsiyettir. Öyle bir şahsiyettir ki, doğru ğaye ve eyi niyet ile silâlansa, cemiyetke qıymeti kesilmez bir isse qoşa bilecek ve tarihqa altın ariflernen yazılıp kire bilecektir», – dep yazdı.
Qırım.Aqiqatqa belli olğanı kibi, tevqif etilgen bu muracaatnı 2017 senesiniñ aprelinde yazdı. 2018 senesi yanvarniñ 20-sinde Vadim Siruknıñ ömür arqadaşı muracaatnı, derc etilmesi içün faaliyetçilerge berdi.
Yaltadaki «Hizb ut-Tahrir (Rusiye ve onıñ tarafından ilhaq etilgen Qırımda yasaq etilgen teşkilât) işi»niñ fiqurantları Arsen Cepparov ve Refat Alimov 2016 senesi aprelniñ 18-nde Qızıltaşta (Krasnokamenkada) tevqif etilgen soñ apiste bulunalar. Bu iş boyunca qabaatlanğanlarnıñ ilk dörtü 2016 senesi fevralniñ 11-nde tevqif etildi. Bular: İnsan aqları boyunca alâqa grubunıñ azası Emir-Useyin Kuku, qurucılar olıp çalışqan Aluşta sakini Muslim Aliyev ile Qızıltaş köyüniñ sakini Enver Bekirov ve Yaltada yaşağan çeçek satıcısı Vadim Siruk.
«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ taqip etilüvi din alâmetine köre yapıla, dep tüşüneler. Advokat Emil Kurbedinov, Rusiye uquqqoruyıcı organları tarafından bu iş boyunca esas olaraq qırımtatarlar taqip etilip, olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruplarğa ait Qırım sakinleriniñ de taqip etilgenini qayd ete.
Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni «terroristik» olaraq tanılğan 15 birleşmeniñ cedveline kirsetip, yasaq etti.
İlhaqtan soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübheli tanılğan Qırım musulmanlarınıñ evlerinde kettikçe daa sıq surette kütleviy tintüvler yapıla.
