Link açıqlığı

Saatnıñ esas haberi

HRW: Qırımdaki Rusiye akimiyeti Ukraina tarafdarları ve qırımtatar faaliyetçilerini taqip ete


Rusiye tarafından ilhaq etilgen Qırımda akimiyet yarımadanıñ ilhaqına qarşı barışıqlı muqavemat içün Ukraina tarafdarları ve qırımtatar faaliyetçilerini taqip ete. Human Rights Watch halqara aq-uquq qorçalayıcıları teşkilâtınıñ Ukrainada insan aqları saasındaki vaziyet aqqında esabatında bu hususta söz yürsetile.

Human Rights Watch teşkilâtında: «2014 senesinde yarımadanıñ Rusiye tarafından zapt etilmesi anından itibaren Qırımda insan aqları saasında başlağan krizis devam ete. Rusiye akimiyeti cemiyet tarafından Rusiyeniñ areketlerini tenqit etüvni itina ile bastırdı ve işğalniñ tenqidi içün adamlarnıñ taqip etilmesini devam ettire. Mustaqil kütleviy haber vastaları ve aq-uquq qorçalayıcılarınıñ ekseriyeti qaçmaq mecburiyetinde qaldılar. (Yarımadada – QA) qalmaqta olğan pek azı akimiyet tarafından tazyıqnıñ artqanını is ete ediler», – dep qayd eteler.

Aq-uquq qorçalayıcıları bozuluvlarnıñ ayrı adiselerini hatırlatalar. Olarnıñ arasında: bir kişilik piketlerde iştirak etkenlerniñ ve soñundan Türkiyege alıp ketilgen qırımtatar liderleri Ahtem Çiygoz ve İlmi Umerovnıñ taqipleri; taqip etilgen faaliyetçilerniñ menfaatlarını qorçalağan advokatlar Nikolay Polozov ve Emil Kurbedinovnıñ yaqalanuvları; ilhaqnı tenqit etken maqaleler içün jurnalist Mıkola Semenanı cezalav.

Esabatta: «Qırım aq-uquq qorçalayıcıları grubu» ükümetten tış teşkilâtı Qırımda ukrain tilinde ögrengen talebelerniñ sayısı 2013 senesindeki 13 599-dan 2016 senesinde 371-ge qadar eksildi, dep bildire. Yerli uquqqoruyıcı organlar, barışıqlı medeniy ve siyasiy tedbirlerniñ ötkerilmesini lâğu etip, Ukrainanıñ tarafını tutqan faaliyetçilerni qorquzalar. Qalğan bir qaç faaliyetçilerden biri, Leonid Kuzmin, Qırımdan ağustosta çıqıp ketti», – denile.

Qırımnıñ Rusiyege tabi akimiyeti tarafından bu hususta açıq menbalarda berilgen izaatlar yoq.

2017 senesinde Human Rights Watch, «Qırımda Rusiyege tabi akimiyet, yarımadada başqa türlü tüşünüvni bastırmaq içün çeşitli manaçıqlar ile qırımtatarlarnıñ taqip etilüvini sertleştirdi», – dep bildirdi.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG