Portekizdeki Ukraina elçihanesi haber etkenine köre, yerli Viseu Now turizm saytı Avropa haritasını Rusiye ilhaq etken Qırımsız köstergen.
Elçihane özüniñ Twiterdeki saifesinde bildirgenine köre, Ukrainanıñ Portekizdeki elçisi İnna Ognivets açıq mektüpnen Viseu Now muarrirligine muracaat etken.
Haber etilgenine binaen, Ukrainanıñ Qırımsız haritası «Vizeydaki Ukrain qutlu doğuvı» reportajında peyda olğan eken.
«Qırım – Ukrainanıñ ayrılmaz parçası», – denilmekte diplomatik temsilcilikniñ haberinde.
Ukraina elçihanesi ayrıca diplomatnıñ Viseu Now portal muarrirligine azırlağan muracaatı da derc etilgendir.
Şimdilik Viseu Now saytı temsilcileriniñ bu hususnen bağlı izaatı yoq.
Daa evel Ukrainanıñ Büyük Britaniyadaki elçihanesi resmiy Londondan britaniyalı Green Board Game kompaniyasına «BrainBox Світ bilgi hazinesi» adlı oyunda, Ukrainanıñ Qırımsız haritasınıñ tüzetilmesini rica etken muracaat yollağan edi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
