600den ziyade Qırım sakini qomşu Rusiye territoriyasında yerleşken arbiy qısımlarğa yollanıldı, dep haber ete «Krıminform», Rusiye mudafaa nazirligi Cenübiy arbiy okrugı matbuat hızmetiniñ malümatına dayanaraq.
«Qırım Cumhuriyeti ve Aqyar arbiy komissariyatları tarafından, yarımadanıñ tışında yerleşken arbiy qısımlarğa 600den ziyade kişi yollanıldı. Olarnıñ yarısından ziyadesi – Cenübiy arbiy okrugqa yollanıldı», – dep bildire KHV Rusiye küç idareleriniñ malümatını.
Rusiye mudafaa nazirligi, Qırımdan Rusiye ordusına 2,4 biñ kişi çağırılğanınıqayt ete.
Rusiye küç idareleriniñ saytlarında işbu malümat resmiy olaraq tasdıqlanmamaqta.
Qırım uquqimaye gruppası, üç yıl zarfında Rusiye ordusına 10 biñge yaqın Qırım sakini çağırılğanını iddia ete.
2018 senesi yanvar ayında Qırım Muhtar Cumhuriyetiniñ prokuraturası Qırım sakinlerini Rusiye ordusına çağırılğanlarına dair celpname kelgeni aqqında telefon ya da elekton poçta vastasınen haber etmelerini rica etken edi.
Qırım ilhaq etilgen soñ Rusiye akimiyeti Qırım sakinlerini orduğa çaırıp başladı. Yarımadada bir çoq kütleviy tedbirlerde Rusiye Silâlı quvetleriniñ propandası yapıla. Qırım sakinleri Rusiye ordusına halqara uquq ve BMT Baş Assambleyasınıñ qararları zıt kelgen taqdirde bile hızmet etmege çağırıla.
