Link açıqlığı

Saatnıñ esas haberi

Qarasuvbazarda Rusiye telükesizlik hadimleri bir kişilik piketlerniñ ekinci iştirakçisini yaqaladılar – faaliyetçiler


Qarasuvbazarda yanvar 18 sabasında Rusiye telükesizlik hadimleri qırımtatarlarğa qarşı repressiyalarğa narazılıq köstermek maqsadınen ötkerilgen bir kişilik piketlerniñ daa bir iştirakçisi Kemal Seityayevniñ evinde tintüv yapıp, ondan soñ yaqaladılar.

«Qırım birdemligi» cemiyet birleşmesiniñ Facebookta bildirgenine köre, faaliyetçini içtimaiy ağlarda «ekstremistik malümatlar»nıñ darqatılmasında qabaatlamaq isteyler.

Faaliyetçiler, Kemal Seityayevniñ Qarasuvbazar rayonı içki işler bölügine (ROVD) alıp ketilgenini bildirdiler.

Qırım.Aqiqat vaqianıñ tafsilâtlarını ögrene. Rusiye telükesizlik strukturalarınıñ saytlarında yaqalanuvlar ve tintüvlerniñ ötkerilmesi aqqında malümat yoq.

Daa evel Rusiye telükesizlik hadimleri, yanvar 18 sabasında evinde tintüv yapılğan qırımtatar faaliyetçisi Giray Kulametovnı yaqalap alıp kettiler.

Seityayev ve Kulametov, oktâbrniñ 14-nde keçken bir sıra bir kişilik piketlerniñ iştirakçileri edi. O vaqıt Qırımnıñ farqlı köşelerinde faaliyetçiler qırımtatarlarğa, musulmanlarğa qarşı repressiyalarına narazılıq köstermek içün piketlerge çıqtılar. Daa soñra ilhaq etilgen Qırımdaki Rusiye mahkemeleri bu piketlerniñ iştirakçilerine cöremeler tayin etti.

Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqalı deye şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.

XS
SM
MD
LG