Rusiye Qara deñiz flotunıñ askeriy korpusına kirgen zenit-raketa polku ilhaq etilgen Qırımdaki Qaçı (Kaça) ava limanı yanında armiy talimini başladı. Bunı yanvarniñ 17-sinde Qara deñiz flotunıñ informatsion teminlev bölüginiñ rehberi Vâçeslav Truhaçov bildirdi.
«Novosti Krıma» Truhaçovnıñ sözlerini şöyle naqil ete: «Ötkerilmekte olğan arbiy talim tedbirleriniñ esas maqsadı, infrastrukturadaki muim obyektlerniñ mudafaasını teşkil etüv esnasında bölük ve batareyalarnıñ bir-birine uyğunlığını talim etmektir.
Onıñ aytqanına köre, arbiy bölüklerniñ talimleri içün AN-26 ve Be-12 uçaqları ile Qara deñiz flotunıñ Deñiz ava quvetleri ve Ava mudafaası helikopterleri er kün celp etileler. Umumen talim meydanına çıqışqa 300-den ziyade arbiy hadim ve 30 adet cenk vastası ile arbiy tehnika celp etildi.
2018 senesinde Aqyardaki Fiolent burnunda S-400 «Triumf» ava mudafaası zenit-raketa kompleksleri «arbiy nevbetke turdı».
Rusiye 2014 senesinde Qırımnı ilhaq etken soñ yarımadada er yıl arbiy talimler keçire. Ukrainanıñ Baş ştabında, Rusiye tarafından ilhaq etilgen Qırımda ötkerilgen arbiy talimlerge qanunsız deyler.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
